Dál čájeha rehketdoallodárkkisteapmi ahte 80 proseantta sis eai nagot duođaštit masa doaibmadoarjja lea golahuvvon, go rehketdoalut eai dohkkehuvvo.
Sámediggi árvvoštallá bissehit doaibmadoarjagiid, lohká Sámedikke ráđđeláhttu Silje Karine Muotka.
– Dál lea dilli nu ahte sii fertejit ovttaskas áššiid geahčadišgoahtit ja guorahallat mot dat váikkuhit sin doarjagiidda. Muhto sáhttá maid šaddat nu ahte muhtumat eai oaččo doarjaga, dadjá Muotka.
Dušše moattis čuvvot sámedikki njuolggadusaid
Sámedikki ja duojáriid searvvit leat dahkan ealáhus šiehtadusa gos duojárat earet eará ožžot doaibmadoarjagiid, okta duojár sáhttá oažžot 150.000 kruvnnu doarjagiin ja ferte vuovdit dujiid unnimusat 50.000 kruvnnu ovdas.
Duojárat geat ožžot doarjagiid galget almmuhit rehketdoaluid ja sii galget registreret fitnodaga. Guorahallamat čájehit ahte dušše moattis čuvvot sámedikki njuolggadusaid, muhto lihká ožžot doarjagiid.
– Njuolggadusaid berrejit buohkat čuovvut
Duojáriid searvvit evttohit sámediggái ahte eai juoge ruđaid sidjiide geat eai beroš njuolggadusain.
– Dat leat almmolaš ruđat ja njuolggadusat lea biddjon, ja dan berret mii buohkat čuovvut, dadjá Duojáriid ealáhussearvvi jođiheaddji Máret Guttorm Graven.
Soitet šaddat bissehit addimis rudaid
Boađus dás sáhttá šaddat nu ahte Sámediggi bisseha addimis ruđaid sidjiide geat eai čuovo njuolggadusaid.
– Dál áigot gieđahallat buot áššiid, ja okta boađus sáhttá šaddat nu ahte dujárat eai oaččo doaibmadoarjagiid nie mot ovdal, dadjá Muotka.
Guldal olles ášši: