Duojár Dronnet Sonjai: – Áiggut go geahččalit?

Otne lei vuosttaš geardi go muhtin gonagasbearrašis galledii Riddu Riđđu -festivála. Ja Dronnet Sonja beasai návddašit musihka, ja maiddái duddjot veháš.

Dronning Sonja prøver seg på treskjæring

DRONNET GALLEDEAMEN FESTIVÁLA: Duorastaga galledii ja rabai Dronnet Sonja Riddu Riđđu festivála. Dás čájeha Drew Michael mo Dronnet galgá go muora herve.

Foto: Carl-Gøran Larsson / NRK

– Riddu Riđđu lea rahpan sámi kultuvrra olles máilbmái, dajai Dronnet Sonja go rabai 26. Riddu Riđđu festivála otne, ja dienna vugiin deattuhii man dehálaš dát festivála duođaid lea.

Ovdal go Dronnet rabai festivála de láidestii festivála jođiheaddji, Karoline Trollvik, su miehtá festivála báikki.

Doppe beasai Dronnet Sonja oaidnit sihke duoji, gullat luođi, máistit liema ja dearvvahit sápmelaččaid ja eará eamiálbmogiid ovddasteddjiid.

Ii ballan gieđaid duolvvideames

Go son deaivvai dán jagáš davviriikalaš álbmoga Rittus, de oaččui Dronnet erenoamáš hástalusa. Namalassii garraduoji duddjot.

Festivalsjef Karoline Trollvik sammen med Dronning Sonja

ČÁJEHA: Festivála jođiheaddji Karoline Trollvik čuovui Dronnega, ja čájehii sutnje mii dáppe dáhpáhuvvá. Mielde gurut bealde lea Romssa Fylkkamánni Bård M. Pedersen.

Foto: Carl-Gøran Larsson / NRK

Drew Michael gullá sihke inupiaq ja yup'ik álbmogii. Son lea muoras čuohppamin dáidaga, ja dan son čájehii Dronnegii.

Dasa lassin hástalii son Dronnet Sonja.

– Háliidat go don geahččalit?
– Dan gal ferte, vástidii Dronnet.

Ja nu 80-jahkásaš Dronnet Sonja maid leamaš mielde duojis maid Drew Michael dáppe lea gárvemin.

– Mo dagai Dronnet?

– Son dagai bures, ja maiddái sihkkaris vuogi mielde, vástida Drew, guhte maid beasai iežára govvet gonagaslaš gussiin.

Riddu Riđu stivrrajođiheaddji, Christina Henriksen, dadjá ahte go Dronnet Sonja dál lea válljen fitnat Riddu Riđđu -festiválas, de čájeha dat man dehálaš festivála lea sihke sápmelaččaide, muhto maiddái álgoálbmogiidda riikkaidgaskasaččat.