Go muhtin čálii Facebookii goddináitaga: «Báhččet sámiid, ja dasto bohccuid», de suhtai Fred Buljo.
Son lea okta dain ollugiin gii lea reageren garrasit dán kommentáras bohccuid birra mat galget leat guhton eatnamiin Ivgus. Ášši lea dál váidon politiijai.
Fred Buljo, gii lea Guovdageainnus eret ja oassin Keiino-joavkkus, muitala ahte dákkár cealkámušat leat mielde dagaheamen sihke balu ja vaši sámi álbmoga vuostá.
– Ii leat dakkár servodat mas mun háliidivččen eallit dahje mas mu mánát galget stuorrut, dadjá Buljo.
Son sávvá ahte olmmoš gii čálii áitaga ádde duođalašvuođa ja bivdá ándagassii.
Berit Kristine Utsi lea Ittunjárgga orohaga ovdaolmmoš ja sis leat geasseguohtumat Ivgus. Son muitala ahte cielaheapmi neahtas lea čađaáigásaš váttisvuohtan orohahkii.
Boanddat ja boazoeaiggádat riidalit, go bohccot sáhttet johtit boanddaid eatnamiidda ja guohtumiidda.
Romssa politiijat duođaštit ahte sii leat ožžon váidaga kommentáras ja leat vuolggahan ášši.
NRK lea váldán oktavuođa suinna gii lea čállán kommentára Facebook:i. Son muitala ahte lea ožžon máŋga reakšuvnna cealkámuššii, muhto ii hálit kommenteret ášši.
Sámediggeráđđi Runar Myrnes Balto (NSR) muitala ahte Sámediggi bargá dál ovttas Politiijadirektoráhtain oažžundihtii bagadusa das mo sáhttá váidit cielaheami, ja doaivu ahte dat gárvána geasi mielde.
Muhtin lea mieleavttus bilidan Fakken bieggafápmorusttegis osiid Vánnjá sullos Romssas. Dan oaivvilda Troms Kraft mii dál váidá ášši.
Stuorra elrávdnje kabel mii manná plánejuvvon bieggafápmoprošektii Fakken II lea čuhppojuvvon rastá.
Nubbi bilideapmi lea nu daddjon Lidar-mihtáris. Dát lea lasermihtár man Fakken elfápmosearvi ja Norgga arktálaš universitehta ovttasráđiid hoidejit.
iTromsø čállá maŋŋebárgga ahte Romssa suohkanis evttohit čohkket sámi mánáidgárdefálaldaga gávpogii.
Dan sii áiggošedje čađahit heaittiheamen Guovssahas mánáidgárddi ja sirdit buot doaimmaid doppe Mortensnes ja Sjømannsbyen mánáidgárdái gos suohkanis lea sierra sámi ossodat.
iTromsø čállá ahte nu áigot bargat daningo lea stuorra sámi oahpaheaddjeváilevuohta olles riikkas. Romssas lea leamaš hástalussan fitnet doarvái bargiid doaimmahit guokte sámi mánáidgárdefálaldaga.
Eai buohkat leat ovtta oaivilis hálddahusa evttohusain. Váhnemat mánáidgárdestivrras čujuhit dasa ahte Guovssahas mánáidgárddi lea Prestvannet skuvlla lahkosis - mii ges lea áidna skuvlla Romssas mas lea sierra sámi ossodat.
Váhnemiin mielas lea dehálaš ahte mánáidgárddi ja skuvlla leaba seamma sajis.
Dan čállá Nordlys.
