Sápmelaš duojár Uljana Julina ii šat duddjo bargosajistis, go das ii biva almmá buori olgobivuid haga.
Fargga mánu áigi botkejuvvui elrávdnji Lujávrri áidna duodjegávppis.
– Dál mii eat bargga dáppe go lea veadjemeahttun guorrut go lea jiekŋagalmmas ja seavdnjat. Dál barggan ruovttus. Oainnát, mis ii leat elrávdnji buvddas- ja bargolanjas.
- Loga:
Báibirmoivi
Lujávrri davvi čearddalaš joatkkaskuvla dat lea addán vistti Lujávrri gildii.
–– Mii leat nuvttá skeŋken duon vistti gildii, go eat šat dárbbaš dan. Mis lea ođđa ja stuorra skuvladállu. Oamasteami sirdimis čuožžiledje váttisvuođat sirdinbáhpáriiguin. Nu čilge Lujávrri davvi čearddalaš joatkkaskuvlla direktevra, Anastasija Rumjantceva.
Skuvlla opmodat lea oainnat federála dásis. Danne ordnet dan gieldda opmodahkan ádjána, go olu institušuvnnat galggašedje dohkkehit dan.
- Loga:
Eai dieđe gosa láiggu máksit
Jus ovdal buvda mávssii láiggu joatkkaskuvlii, dál de sii eai šat dieđe geasa ja man láhkái galggašedje máksit go rehkegat eai šat boađe njuolgga buvdii.
– Byrokráhtalaš moivviid geažil mii eat beasa dál bargat ja vuovdit dujiideamet ja mátkemuittuideamet. Dat koronadilli ja ráddjemat leat olu heađuštan min gávpedoaluid ja dál mii eat vuovdde masá maidege ja massit olu ruđa, muitala duodjebuvdda eaiggát Irina Galanova.
Dál gávppi eaiggát ja bargit dušše muhtomin bohtet deike geahččat gálvvuid ja veahá ligget lanjaid gássauvnnain.
Sii gorrot ruovttus ja vurdet dassáigo ámmátolbmot čovdet váttisvuođaid vistti gullevašvuođain ja sii beasašedje fas rahpat Lujávrri áidna duodjegávppi.
- Loga: