Duodji rabai Åste (72) geainnu sámevuhtii

Son lea nuorravuođa rájes háliidan duostat čájehit son lea sápmelaš. Dál de lei Åste Eriksenis liiba dahkat dan.

Åste Eriksen ja Brita Julianne Skum

OAHPPÁ SÁMEGIELA: Duddjodettiin Åste Eriksen oahppá sámegielsániid mat gullet duddjomii. Bagadallin lea Brita Julianne Skum.

Foto: Marit Sofie Holmestrand / NRK

Les artikkelen på norsk

– Mun lean várra jo 50 jagi jurddašan, ahte galggašin čájehit gii mun duođai lean. Mánnán ohppen, ahte ii galgga goassige jearrat sámevuođa birra. Ja de lei dát, čilge Åste Eriksen ja bidjá olgeščuvddis njálmmis ovdii.

Åste Eriksen

II SÁMÁSTIT: Åste Eriksen čájeha maid oahpai mánnán.

Foto: Marit Sofie Holmestrand / NRK

Áltálaš lea ealliagi muitán maid mánnán oahpai. Dás ii leat beassan eret ovdalgo gieskat mearridii searvat Álttá Sámiid Searvvi Duodji LAN-doaluide.

– Mus lei nu mearihis miella oahppat sámi duoji. Mun lean álo leamaš sáhkkii dasa. Dat lea nu erenoamáš. Máŋgii jo lean fitnan duodjegávppis, de lean viggan geahččat mo duot ja dát dahkko, ja mo dat lea ráhkaduvvon, muitala Eriksen.

Son muitá ahte áhkku sámástii, muhto dan birra ii galgan nu jitnosit hállat.

– Dál dovddan, ahte dagan justa dan maid ieš háliidan. Dáppe dovddan oadjebasvuođa ja oktiigullevašvuođa. Mus lea hirbmat buorre dovdu ja lean ilus, lohká son.

Garra dáruiduhttin

Kuršajođiheaddji Inger Elin Utsi lohká vahkkoloahpa Duodji LAN mávssolažžan sápmelaččaide geat ásset dán guovllus.

Inger Elin Eriksen

ÁVKKÁLAŠ: Inger Elin Utsi lohká mávssolažžan oahpahit olbmuid duddjot.

Foto: Marit Sofie Holmestrand / NRK

– Dá lea oainnat dakkár guovlu gos lea leamaš garra dáruiduhttin. Dat geat bohtet mu kurššaide leat dábálaččat olbmot geat eai leat duddjoma beassan oahppat ruovttuin. Sii háliidit oahppat sámi árbevieru, čilge Utsi.

Utsi lohká iežas njuorrasit go olbmot nu mo Åste Eriksen sutnje muitalit maid sidjiide mearkkaša oahppat duddjot.

– Munnje lea erenoamáš buorre gullat maid son jurddaša dál, muhto seammás váivi gullat man guhká son lea gillán dán geažil. Åste lea gievra go dál eallilanolmmožin lea mearridan eambbo oahpásmuvvat iežas kultuvrii, lohká Utsi.

Stuorra menestus

Álttá Sámiid Searvvis leat duhtavaččat mannan vahkkoloahpa Duodji LAN-doaluiguin. Danne orru nu, ahte sullasaš doalut šaddet maiddái boahtteáiggis.

– Dát gal lei hirbmat suohtas. Boahtte jagi galggašii vel ain stuorát Duodji LAN, sávvá jođiheaddji Brita Julianne Skum.

Per Johnny Sara

Nubbejođiheaddji Per Johnny Sara.

Foto: Marit Sofie Holmestrand / NRK

Vihtta suorggi ledje dán jagi doaluin. Dat leat luhkkagoarrun, gáktegoarrun, veaskogoarrun, silbačiŋat ja sámegiella.

Nubbejođoheaddji Per Johnny Sara sávvá ahte sii boahttevaš doalut galggašedje geasuhit maiddái almmáiolbmuid.

– Garraduoji livččii suohtas geahččalit ja oažžut eambbo dievdoolbmuid mielde dasa. Nubbi livččii mearrasámi duoji, lohká Sara.