Vasilij Batagai čilge árbevirolaš čiŋas. Dát lea etniid divraseamos dávvir, danne rájadit dán čiŋa hirbmat bures. Govva maid lea tevdnen muitala eatnis, dás lea son dat stuorámus loddi. Ja juohke mánná gii riegáda, sutnje ráhkadit unna lottáža mii goallostuvvo dan stuorraloddái. Jos oktage mánná jápmá, de ii gálgga dan lottáža váldit eret. Dát čikŋa muitala man galle máná eadni lea riegádahttán.
Gávu gahpir lea dego eatni divrras dávvira, čiŋa, beassi. Ja su dávvira ii oaččo ii giige lihkahallat, dannego dat lea áivvefal su.
Ráhkadedje árbevirolaš šiela
Vasilij Batagai čájehii maid mo dolgána čearda merkii dávviriiddis mat ledje divrasat sidjiide. Earret eará galge johtimiin merket bures buot mii lei metallas, dannego daid ii eisige galgan láhppit. Skirttet lei divrras ávnnas, danne galggai dat gárrojuvvot nannosit ja merkejuvvot šielain. Áinnat jos skirtteha láhppe, de ii lean šat masa ruittu heŋgii suomurrii tjummii, dahjege lávvui.
Šiela nissongahpiris
Muđui bidje maid dán šiela dáid divraseamos dávviriidda. Šielas lea lottejuolgi, ja dat galgá várjalit dávviriid láhppomis. Maiddái nissongahppiidda bidje dán šiela. Nu lea leamaš dolgánaid árbevirolaš nissongahpir čiŋahuvvon áiggiidčađa.
Ulloduodjebájis ráhkadedje herggiid
Ulloduodjebájis leigga Julia ja Evgennij Porotov oahpaheaddjin. Das čájeheigga mo galgá ráhkadit herggiid streaŋggas ja ullus. Soai leaba máŋggabealat dáiddarat ja iežaska lohkaba birget oalle bures dáiddabargguiguin.
Soai bargaba maŋgga laganaš dáiddalaš bargguid Taimyras. Čiŋaheaba dáluid, máleba govaid váikke olles seinniide. Julia lea maid bivttashápmejeaddji, muitalasttá ahte biktasat mat sutnos leat badjelis, daid lea son ieš hápmen ja gorron. Soai bargaba maid dihtordáidagiiguin ja buot govaid maid ráhkadeaba, daid máleba ovttas. Sutno dáiddalašvuohta lea oassin sutno beaivválaš eallimis, muitala Julia Porotov.