Hopp til innhold

Dehálaš sámi álbmoga ja álgoálbmogiid vuoigatvuođaid ovddideaddji lea vádjolan eret

Sámi álbmoga ja álgoálbmogiid vuoigatvuođaid ovddideaddji ja láhkadovdi jurista Leif Dunfjeld vádjolii eret mannán bearjadaga 71-jahkásaččan.

Leif Dunfjeld
Foto: Thor Thrane / NRK

– Dunfjeld lea iežas diplomáhtalaš vuogi mielde ovddidan vuoigatvuođaid ja geavahan iežas diđolašvuođas ja čehppodagas go ovddidii áššiid. Ja dat dagai su stuorisin, nu dadjá álgoálbmotáššedovdi Magne Ove Varsi.

Leif Aarnold Dunfjeld ovddidiige ángirit sihke sámi ja eará álgoálbmotvuoigatvuođaid. Dunfjelda muitun báhcet sihke riikaidgaskkasaš álgoálbmotvuoigatvuođaáššit ja sámi riikadási vuoigatvuođaáššit. Earret eará Son lei guovddážis ILO šiehtadallamiin 1970-logu rájes ja gitta dassážii go ILO dohkkehuvvui Norggas 1990:s.

Dunfjeld lei maid guovdilis Ovttastuvvan nášuvnnaid álgoálbmotdeklarašuvnna šiehtadallamiin dassái go dat 2007:s mearriduvvui ja son lei maid maid fágaolmmožin ráđđehusa beales Finnmárkolága ja sámelága oktavuođas.

– Sus leage stuorra mearkkašupmi buot álgoálbmogiid gaskkas, muitala Magne Ove Varsi.

  • Guldal ášši:
    Dunfjeld japman

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.