Dušši digaštallat Facebookas 

Leat go don okta dáin gii dávjá searvvat Facebook debáhtaide? Jus du ulbmil lea rievdadit olbmuid oainnuid de gal soaittát geavahit áiggi duššái.

debatt på facebook

Geahččalat go jorgalahttit earáid oainnuid Facebook digáštallamiin? Has de berret geavahit áiggi masa nu earái?

Foto: NRK

Mii digaštallat áššiid sosiála mediain eanet go goassige ovdal.

Eai gallis rievdat oainnus Facebook debáhta vuođul, dadjá Hans-Petter Nygård- Hansen gii lea sosiála media áššedovdi. Son čujuha ođđa dutkan raportii maid leat čađahan USA:as.

Dutkan man Pew Research Center lea čađahan čájeha ahte dušše okta juohke logi olbmos rievdada oainnus sosiála media digaštallama geažil.

Hans-Petter Nygård-Hansen

Hans-Petter Nygård-Hansen lea guláhallanráđđeaddi ja sosiála mediaid áššedovdi. Son jáhkká mii digáštallat duššái Facebookas.

Foto: Ingar Næss

– Gánnáha go dasto geavahit áiggi digaštallat Facebookas jus das ii leat ávki, jearrá Nygård Hansen. Dát dušše nanne riidduid ja sierramielalašvuođaid servodagas.

Guorahallan čájeha ahte lea erenomáš váttis rievdadit nuppi olbmo oainnu sosiála mediaid bokte hearkkes áššiin mat boktet ollu dovdduid.

Ávžžuha hilgut kommenteren vejolašvuođa

– Dán áigái leat eanaš digaštallámat čálalaččat. Dákkár digaštallamiin orro leamen deháleabbon buktit ovdán iežas oainnuid go váldit vuhtii earáid jurdagiid.

Hans-Petter Nygård-Hansen ávžžuha maid neahttaaviissaid heaittihit kommenteren vejolašvuođa go dain dávjá lea fasttes giella mat ovddidit vaši ja duhtameahttunvuođa.

– Dát eai leat buorrin masage. Čálalaš digaštallamiin eai leat olbmot ulmmálaččat.

– Erenomážit go lea sáhká áššiin mat boktet ollu dovdduid ja main digaštallit dávjá fallehit olbmo eaige ášši.

Digaštallá vaikko ii liiko dasa

Biehtár Ovlla Eira mieđiha iežas geavahit ollu áiggi Facebook digaštallamiidda. Son ii loga liikot daidda muhto dovdá ahte ferte.

Biehtar Ovlla Eira

Biehtár Ovllá Eira digáštalla áŋgirit sosiála mediain go hálida bissehit giellasiid ja ovdagáttuid.

Foto: Marianne Boine / NRK

– Go leat sáhká sámi áššiin de leat ollu ovdagáttut ja olbmot čállet vaikko makkár giellasiid. Jus daid ii oktage duste de jáhkket olbmot dáid boasttuvuođaid duohtan.

Maŋimuš áiggiid lea son áŋgirit oasálasttán digaštallamiidda sámi báikenamma galbbain. Muhto son ii dieđe leaš go leamaš ávkin.

– In sáhte mearridit maid earát galget oaivvildit. Nu guhká go beasan buktit ovdan rivttes dieđuid de lean bargan maid mon sáhtán.

Leat go ieš goassige rievdadan oainnu go leat digaštallan sosiála mediain?

– Dát ii leat gal munnje váttis jus muhton sáhttá fáktáiguin duođaštit ahte mus lea boastut.

Ále čále, ságás!

Jus áiggot jorgalahttit muhton olbmo oaivila de lea buot buoremus beassát suinna sáhkalagaid čájeha guorahallan.

– Jus it beasa ságastit olbmon njuolga de dáidet video dahje podkasta buoret vuogit go digaštallat sosiála mediain, dadjá sosiála media áššedovdi Hans-Petter Nygård-Hansen.