Dušše okta Sámi Grand Prix oassálasti Heahtás

Bearjadaga lágiduvvui Sámi Grand Prix oassegilvu Heahtás Suomas. Dušše okta juoigi searvvai ja beasai njuolga finálii.

Ingá-Máret Gaup-Juuso

Inga Marit Gaup Juuso lei áidna juoigi oassegilvvus Heahtás Suomas.

Foto: Ođđasat / Yle Sápmi

Ingá-Máret Gaup-Juuso lei áidna oassálasti Sámi Grand Prix oassegilvvus Heahtás.

– Dá lea dat álkimus gilvu mas mus goassige lean leamaš mielde, logai Gaup-Juuso go de čielggai ahte son dat lea vuoitán gilvvu.

Yle Sápmái son dadjá, ahte ii eisege leat šlundon go lei áidna oasseváldi.

– Dieđán Suomas leat eambbosat geat beroštit luođis, ja munnje lei dehálaš searvat dáidda gilvvuide vai nuorat oidnet ahte lea vejolaš leat mielde dákkár gilvvuin, lohká Ingá-Máret Gaup-Juuso.

Ii veaje maidege go eai searvan eanet oassálastit

Nils Johan Vars

Sámi Grand Prix buvttadeaddji Nils Johan Vars lei sávvan eanet juigiid searvat Heahtá oassegilvui.

Foto: Roger Manndal, NRK

Sámi Grand Prix buvttadeaddji Nils Johan Vars dadjá ahte ii veaje olus dasa maidege go eanet oasseváldit eai searvan Heahtás.

Vars dadjá ahte Heahtá doalut šadde aŋkke buorit go Ingá-Máret juoiggastii guokte lassiluođi, ja dasa lassin serve vel mánát lávlut.

– Diehttelas livččii leamaš buorre jus eanebut searvvaše gilvvuide, go de šattašii dego konsearta, dadjá Vars.

Gula maid SGP buvttadeaddji Nils Johan Vars muitala:

Sámi Grand Prix buvttadeaddji Nils Johan Vars ii loga sáhttit dahkat maidege go dušše okta oassálasti searvvai SGP Heahtá oassegilvui.