Hopp til innhold

Dološ luođit ja govat

Odne beasat vásihit dološ luđiid ja govaid Kárášjoga Čálliidlágádusas, luođit mat báddejuvvo ovdalaš nuppi máilmmi soađi Kárášjogas ja Porsáŋggus.

Historihkkár Aage Solbakk

Odne beasat vásihit dološ luđiid ja govaid, mat leat báddejuvvon ja govvejuvvon ovdal nuppi máilmmi soađi. Historihkkár Aage Solbakk ovdanbukta dáid odne Čálliidlágádusas Kárášjogas.

Foto: John Einar Eira jr. / NRK-Sápmi

Duiskalaš, Erich Wustman báddii dološ luđiid Kárášjogas, Porsáŋggus ja soames luođi vel Guovdageainnus ovdalaš nuppi máilmmi soađi, ja govvii maid seammas go lei davvin.

Historihkkár almmusdahttá dološ luđiid ja govaid odne

Historjjá dutki, Aage Solbakk eallá historján, ja son lea gávdnan dološ Kárášjogagovaid ja luđiid maid Erich Wustman lea govven ja bádden. Odne beasat oaidnit ja gullát dáid Čálliidlágádusas odne 11.00 rájes. Solbakk muitala ahte vaikko lea oalle guhkes ági go báddemat leat dahkkon, de lea dáin buorre kválitehta.

Duiskalaš gii beroštii sámi kultuvrras

Lei Erich Wustman gii oažžui guovtti jahkái stipeandda Berlin museas johtit Sámis ja čohket sámi luđiid ja govaid dalle 1935 rájes. Wustman liikui nu bures sámis ahte jođii njeallje jagi dáppe ja čohkii luđiid Kárášjogas, Porsáŋggus ja soames vel Guovdageainnu luđiid muitala historihkkár, Aage Solbakk.

– Ii dás doarvái, Wustman liikui nu bures sápmái ahte oahpái maid sámegiela dan bottá go lei Kárášjogas, lohká Solbakk.

Dološ govat

Dološ govat, govvejuvvon ovdal nuppi máilmmi soađi.

Foto: John Einar Eira jr. / NRK-Sápmi

Ilbme maid guokte girjji

Erich Wustman oahpásnuvái boazosápmelaččaiguin Kárášjogas, sin mielde son jođi geasseorohahkii Davvenjárgii. Dán johtimis čálii son guokte girjji vel Kárášjoga ja Davvenjárgga birra.

Aage Solbakk muitala ahte leat ožžon lobi lágidit čájáhusa dál odne dáppe Kárášjogas, gos beassá oaidnit lagábui 60 gova ja gullát 30 luođi maid Wustman lea bádden sámis.

Kárášjohka 150 jagi oktavuođas

Lea lunddolaš lágidit dákkár dehálaš čájáhusa odne Kárášjogas, go dán jagi han Kárášjohka ávvuda 150 jagi, lohká historihkkár Aage Solbakk.

Gula Historihkkára Åge Solbakk:

Historihkkár Aage Solbakk muitala otná čájáhusa birra.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.