NRK Meny
Normal

Áigu musihkain bargat

Kárášjohkalaš Ánne Máddji Heatta (23) ii leat nu mo eará doavtterstudeanttat. Dál son lea váldán jahkebeali bottu vai beasašii musihkain bargat. Su deaivvat dán mánu Árdna-prorgámmas.

Ánne Máddji Heatta
Foto: Dan Robert Larsen / NRK

Árdna-joavku, govvejeaddji Mattis Wilhelmsen ja doaimmaheaddji Dan Robert Larsen leaba dán mánus viidát johttán. Soai leaba fitnan Oslos, Romssas, Guovdageainnus ja Álttás. Duorastaga guovvamánu 15. beaivve diibmu 17.15. oainnát maid doppe leaba ráhkadan.

Espánjai musihkain bargat

 Nuorra doavtterstudeanta Ánne Máddji Heatta lea dán mánu guossi. Jearahallamis son muitala manne son gaskkalduhttá doavtteroahpu beannot jagi ovdalgo livččii geargan oahpuin. Gulat maiddái manne son áigu Valencias Espánjas ráhkadit luđiid, iige davvin duottarmáilmmis ja ealli sámi birrasis.

 

Beaivvážis heajos lanjat  

 

Leif Isak Nilut
Foto: Dan Robert Larsen / NRK

Beaivváš Sámi Teáhter lea jo 25 jagi dálostallan Guovdageainnu kulturviesus. Ártnas oainnát man láhkái gáržžes ja unnán heivehuvvon lanjat čuhcet sámiid našonála teáhtera dáiddalaš doaimmaide. Seammás buohtastahttá Árdna diliin mii Norgga davimus guovlluteáhteris lea. Mii oaidnit man ođas ja fiinnis Hålogaland teatera ođđa teáhterdállu lea.

 

Mearrasámi luođit ja filbma

 

Karen Anne Buljo
Foto: Dan Robert Larsen / NRK

Oahpaheaddji Karen Anne Buljo orru Álttás ja lea erenoamáš doaimmalaš olmmoš. Ovdalaš juovllaid almmuhuvvui su vuosttaš CD-skearru, mas leat mearrasámi luođit. Fargga guovtti vahku dassái son lei beakkán Mari Boine mielde Osloi Spellemann-bálkkašumi juohkimii. Karen Anne lea oainnát čállán njeallje lávlaga ja ovtta jorgalan sámegillii Mari ovddas. Karen Anne muitala maiddái iežas ođđaseamos prošeavtta birra, go dál son lea ráhkadeamen giehtačállosa ođđa sámi nuoraidfilbmii.