NRK Meny
Normal

Sámeminsttar doarju homofiila sápmelaččaid

Sámeministtar Jan Tore Sanner oassálattá sámi homofiillaid vázzimiin Europride-doaluin. Áŋgirdeaddji lea movttet.

Jan Tore Sanner

Sámeministtár Jan Tore Sanner áigu ihttin vázzit fárrolaga sámi homofiillaidguin Europride doaluin Oslos.

Foto: Roald, Berit / NTB scanpix

Sámeministtar Jan Tore Sanner áigu ihttin vázzit fárrolaga sámi homofiillaiguin Europride-doaluin Oslos. Leammuid Lemet Ánde, Lemet Ánde Stueng, mielas leat dát mielde čalmmustahttime dan ahte sámi homofiillat eai galgga orrut čihkosis.

– Suohtas go lea nu stuora beroštupmi

– Dat lei hirbmat suohtas. Jurddašin ahte lea oba buorre go departemeanta maid beroštišgoahtá min áššis. Ii leat goassege leamaš ná stuora beroštupmi sámi oasis vázzimis. Go ministtar boahtá, de šattan hirbmat movtta ja dovddan ahte olbmot beroštit duođai, lohká son.

Europride-doalut leat festivála man ulbmil lea čalmmustahttit homofiillaid áššiid ja vuoigatvuođaid. Dán jagi dollojuvvojit dát Oslos, ja ovdal leat eurohpágávpogat nugo earret eará London ja Madrid lágidan doaluid.

Ihttin lea ráidovázzin, dahje parade Oslo gáhtain. Diimmá paradain oasálastte 12 500 olbmo. Dás lea maid sierra sámi oassi, ja juste sin fáro áiguge sámeministtar Jan Tore Sanner vázzit.

Illuda doarjaga ovddas

Lemet Ánde Stueng deltok i årets homoparade.

Lemet Ánde Stueng, dá ovdalaš homofiillaid vázzimiin

Foto: Mette Ballovara / NRK

Sanner čállá preassadieđáhusas ahte son háliida čájehit ahte doarju homofiila sápmelaččaid. Su mielas lea politihkkáriin ovddasvástádus dasa ahte hutkat servodaga mas buohkat dohkkehuvvojit.

Dát illudahttá Leammuid Lemet Ánde. Son diehtá bures ahte ii leat álki eallit sámi homofiillan. Dán duođaštit maiddái dutkamat.

– Dat ii leat mihkke mainna sáhtát rábmot ahte don leat. Dat lea juoga fasti ja juoga maid sohka ja servodat ii hálit.