NRK Meny
Normal

Doarjjakonsearta Ellos Deanu miellačájáhussii

Guovtti vahku geažes dollo Ellos Deanu doarjjakonsearta Ohcejogas, mas sihke Suoma ja Norgga beale ártisttat leat mielde.

Ellos Deatnu, Čearretsuolu

Dá lea oassi Ello Deatnu-joavkkus čoagganan Čearretsullui.

Foto: Ellos Deatnu

Áslat Holmberg fisker i Tanaelva

Áslat Holmberg.

Foto: Ksenia Novikova / NRK

– Doarjjakonseartta ruđalaš ulbmilin lea doarjut Ellos Deatnu-joavkku doaimmaid. Dienas geavahuvvo stuorra čoahkkinlávvui ja uhcit goluide dego borramuššii, boaldinmuoraide ja bensengoluide, čilge Áslat Holmberg Ellos Deatnu-joavkkus.

Doarjjakonseartta loaiddasteaddjit leat Paleface, Wimme, Niko Valkeapää, Ailu Valle, Ámmon Johnskareng, Amoc, Ánde Somby, Dutta Per Ándde Juhán, Niillas Holmberg, Sara Marielle Gaup Beaska ja Ulla Pirttijärvi.

Doarjjakonsearta lágiduvvo Ohcejoga Busteldearpmis maŋŋebárgga suoidnemánu 25. beaivve.

Niko Valkeapää

DOARJU GIČČU: Niko Valkeapää.

Foto: Mariela Idivuoma / NRK

Julggaštedje moratorio

Ellos Deatnu julggaštii ovdal mihcamáraid nugohčoduvvon moratorio Deanu Čearretsullui. Dát mearkkaša, ahte dán sullos eai doaimma Norgga-Suoma ođđa guolástannjuolggadusat Deanučáhcadahkii.

Joavku ovddida sámiid iešmearrideami Deanu čázádagas ja doalaha moratorio Čearretsullos olles geasi.

Mikkâl Antti Morottaja (Amoc) og Ailu Valle

DOARJUBA GIČČU: Mikkâl Antti Morottaja (Amoc) og Ailu Valle.

Foto: Dan Robert Larsen / NRK Sápmi

– Váldoulbmilin lea čohkket olbmuid miehtá Deanu čázádaga ja eará guovlluin maid. Ellos Deatnu lea dušše okta jovkkoš. Mii hálidat ávžžuhit ja movttidahttit olles álbmoga doaibmagoahtit sámiid ja luonddu vuoigatvuođaid bealis. Aiddo dál dárbbašuvvo buohkaid veahkki, cealká Beaska Niillas.

Niillas Beaska og Petra Laiti

Beaska Niillas ja Petra Laiti lávostallamin Čearretsullos.

Foto: Ksenia Novikova / NRK

Doarjjakonseartta eanemus dovddus ártista lea hip hop-ártista Karri «Paleface» Miettinen.

– Hálidan doarjut Ellos Deatnu-joavkku ja buot sápmelaččaid. Sin sajádaga ferte ain nannet. Sámiid jietna ferte gullot Suoma ja Norgga servodagain, erenoamážit sin árbevirolaš ealáhusaide guoski mearrádusain, lohká rap-ártista ja Suomi100 fidnu hálddahusa lahttu Paleface.

Karri “Paleface” Miettinen

DOARJU GIČČU: Karri «Paleface» Miettinen.

Foto: Tiina Jutila / Yle