Norgga ráđđehusa doarjjabellodagat Gurutbellodat ja Kristtalaš álbmotbellodat eai dohkket ráđđáhusa evttohusa unnidit sámi áviisaid preassadoarjaga badjel njeljiin miljon ruvnnuin.
– Mun lean vissis das, ahte nie ii šatta boadus go Stuorradiggi juovlamánus loahpalaččat gieđahallá stáhtabušeahta, lohká Kristtalaš álbmotbellodaga stuorradiggeáirras Geir Toskedal.
– Sámi áviissat leat dehálaččat
– Sámi áviissat leat dehálaččat sihke sámegiela ja sámi kultuvrra seilluheapmai, ja sii ainjuo vuos áigot iežaset bušeahttaevttohusas evttohit sámi áviisaide govttolaš doarjaga, lohpida Toskedal.
Son ii vuos dáhto almmuhit mearkkašago dat de lasáhus sámi áviiside. Buorre mealgadii son goit dáhkida, ahte ráđđehus evttohus ii oaččo eanetlogu stuorradikkis.
Ráđđehus dat evttoha geahpedit Norgga oppalaš preassadoarjaga 50 miljon ruvnnuin, ja sámi áviissaide árvaluvvo badjelaš 4 mijona unnit. Sihke Ságat áviissa ja Ávvira váldodoaimmaheaddjit leat dovddahan ahte de sáhttá šaddat sáhka unnidit bargoveaga dahje vahkkosaš áviisalogu, jus fal evttohus dohkkehuvvošii nie.
Gurutbellodaga Andre Skjeldal maid lohká iežaset vuoruihit caggat ráđđehusa evttousa ammes sámi áviissat eai galggašivčče massit máŋga miljon ruvmmu.
– Midjiide lea preassafriddjavuohta ja cealkinfrriddjavuohta dehálaš, deattuha Skjeldal.
– Eai gierdda nie stuorra geahpedeami
Ráđđehus oaivvilda, ahŧe sami áviissat fertejit gierdat ahte preassadoarjja unniduvvo go juo sámiaviisaid preassadoarjja lea duppalaston logi jagis,nuppelogi miljonas 25 miljonii.
Mediadutki Eli Skogerbø guhte guhkit áigge lea čuvvon sámi áviissaid dili, ii ádde man láhkái sámi áviisat galgašedje nákcet doalahit dálá fálaldaga jus goabbáge sámi áviisa oaččošii sullii 2 miljon ruvnnu unnit preassadoarjaga.
– Dien mađe stuorra bušeahttageahpedeapme lea dramáhtalaš sámi áviissaide go ii leat nu stuorra kommersiella márkka mainna áviissat sáhtášedje ovdamearkka dihtii lohkkiidlogu lasihit nu olu ahte ieža sáhtášedje lasihit dietnasa, lohká Skogerbø.