Sverre Porsanger lea gullon ollu. Son lea lávlu, neavttár, čálli ja giellabargi. Mánnán son juo šattai beakkánin danne go lei Ánte filmmas váldoneavttárin. Máŋŋá leat su oaidnán maid eará filmmain ja teáhterlávddis, ja leat gullan maid su lávlumin radios Eino Leino lávlagiid maid Pekka Sammallahti lea jorgalan sámegillii. Sverre Porsanger lea kárášjohkalaš gii ássá Ohcejogas.
Čállán nuohtaid diktagirjái
Son lea čállán nuohtaid divttaide gulu mielde, go lea lávlun divttaid ja čuojahan gitárain. Ja ieš son áigu vel lávlut ja čuojahit CD:ii mii galgá čuovvut nuohttagirjji maid son lea ráhkadan B. Moske diktagirjái "Juvviid áigogon čiehkat".
Guhkes áiggi geavahan čállit nuohtaid
Dáinna son gal lea bargan oalle guhká, 22 jagi, ii son leat duopman dáinna. Dál lea nuohttagirji sáddejuvvon prentehussii, ja ieš navdá girjji ja CD beassat álmmustahttit dán giđa.