Olbmot orro doallame vuoiŋŋahagaset dan botta go girječálli Anne Wuolab logai jitnosit girjjistis «Ii šat summál».
Máŋggas eai bálljo duostta dovddastit, ahte sii leat lohkan girjji mas Wuolab muitala mii geavvá olbmuid oađđenlanjas.
HEAHPANADDET: – Olbmot hui siivvožit munnje muitalit ahte sii leat lohkan mu girjji, muitala Anne Wuolab.
Foto: NRK / Elle Gaup-JohansenMoattelogis ledje boahtán Troanddima Metodisttagirkui gullat rabas ságastallama sámi erotihka birra. Sihke nuorat ja ollesolbmot.
Mii boktá sápmelaččain himuid?
Lei lullisámi festivála «AMMA Tråante» mii lágidii rabas ságastallama.
BIVASTUVVÁN: Anne Wuolab, June Sommer Strask ja Marianne Karin Ulriksen Kappfjell lohke iežaset binnánaš bivastuvvon go gerge ságastallame sámi seksa birra.
Foto: NRK / Vanja UlfsnesPanelas čohkkáiga girječálli guovttos Anne Wuolab ja June Sommer Strask.
Wuolab muitalii ahte su girjji «Ii šat summál» ulbmil lea boktit sápmelaččain himuid.
Dat orro doaibman.
– Lean jođihan sullii ovtta girjji juohke vahku das rájes go vuovdigohten daid, muitala son.
SÁMI EROTIHKKA: Anne Wuolaba čállá seksuálalaš deaivvademiid birra «Ii šat summál» girjjis.
Foto: ANNE WUOLABVaikko girji lea johtán bures de lei su mielas váttis gávdnat vuogas sániid maiguin čilgešii seksuálalaš deaivvademiid vuohkkasit.
– Viggen álggos aivve dakkár sániid geavahit maid doavttir geavaha, čilgii son ja bohkosii.
Ella Marie heahpana sexain
Nuorat maid ain heahpanaddet go hupmet seksuálalaš deaivvademiid birra.
TABUÁŠŠIT: Ella ja Sajje sávvaba Sápmái eanet rabasvuođa, danne ráhkadeigga podcasta «Gozuid Alde».
Artista guovttos Ella Marie Hætta Isaksen ja Lávre Johan Eira leaba ovttas prográmmajođiheddjiin Sajje Solbakkain digaštallan seksa NRK podcastas, «Gozuid Alde».
Hætta Isaksen ii loga iežas hárjánan rahpasit hupmat dán fáttás, ja ruvssodišgoahtá álggadettiin juo.
Lávre ges árvvoštalai ahte sápmelaččat soitet baicce guhkes fiinna luohtešuoŋaid bokte ovddidit seksuálalaš jurdagiid.
Tråante rabas ságastallama panelajođiheaddji Marianne Karin Ulriksen Kappfjell maid lohká iežas jáhkkit dan seammá.
– Lean jurddašan ahte mis han lea maid eará giella, mas ii dárbbaš geavahit sániid go čilge, dajai Kappfjell.
Luđiin ovddidit erotihka?
– Dál áiggun du juoiggastit, logai dievdu fáhkka.
Kappfjell muitalii fearána gos su olmmái vásihii iežas dego nuolahuvvon álásin go dievdu su juoiggastii.
– Dát nieida ruvssodii oaiveasis gitta juolgesuorpmaide. Lei nu garra vásáhussan sutnje. Ii lohkan iežas goassege ovdal dovdan nie álásin, čilgii Kappfjell.
Snoallan sáhttá hehttet rabasvuođa
Girječálli Anne Wuolab jáhkká ahte snoallan lea dat mii dagaha ahte olbmuide šaddá unohas hupmat seksa birra.
– Jus olmmoš snoallá duinna, ja don it háliit dat galgá dáhpáhuvvat, de sáhtát soardašuvvat.
GIEVKKANBEAVDDI BIRRA?: – Seksa ii soaitte dakkár man birra galgá hupmat etniin ja áhčiin. Soaitá galgat muhtin earáin, árvala girječálli Anne Wuolab.
Foto: NRK / Elle Gaup-Johansen– Snoallan almmatge sáhttá maid leat issoras somá go buohkat gulahallet ja háliidit searvat dasa, dajai Wuolab.
Golbma buoremus erohtalaš girjji
Anne Wuolab ii loga iežas girjji erohtalažžan,muhto girji mas leat seksuálalaš deaivvadeamit.
Jus áiggut lohkat sámi erotihka de Wuolab namuha dán golmma girjji:
- Bajándávgi (Marry Áilonieida Somby)
- 69 čuoldda (Inger-Mari Aikio)
- Sex and the Sápmi (Anne Nymås)
