NRK Meny
Normal

Digáštalle guaranaid dili

Brasilalaš indiánaid fuones dilli lei sáhka, go Sámediggi deaivvadii Norgga olgarikadepartemeanttain mannan váhkus.

Representant for Guarani-indianerne i Brasil
Foto: Erling Borgen / NRK

Brasilalaš indiánat, Guarani-kaiowa álbmot, leat sápmelaččain bivdán veahki ja beroštumi, go Guaranit áiggošedje ruovttoluotta árbevirolaš eatnamiid maid álbmot lea massán earret eará bioboaldámuša buvttadeapmái.

Massán árbevirolašeatnamiid

Sámediggi čoahkkinasttii mannan váhkkus Norgga Olgoriikkadeparteamanttain, ja okta dain áššiin maid čoahkkimis digáštalle lei, guarani-álbmoga dili, muitala Sámedikkipresidenta Egil Olli.

- Mii leat lokten ášši, ja dát ii leat amas ašši Norgga olgoriikadepartementii.

Maŋimuš moaddelot jagis leat Guarani-Kaiowa indiánárat duvdiluvvon eret iežaset árbevirolaš eatnamiin go brasilia eiseváldit leat addán eatnamiid fitnodagaide geat buvttadit earret eara bioboaldamuša stuorra biergobuvttadeaddjide geat vuvdet bierggu oarjemáilbmái.

Dat lea dagahan ahte indiánárat leat massán iežaset eallin láibbi. Brasilia eiseválddiid logut čájehit ahte lagabui 30.000 guaraniat nelgot.

Lohppida ovddidit ášši

Čoahkkimis mannan vahko geavahii sámedikkepresideanta, Egil Olli, vejolašvuođa ovddidit guarani dili stadačállái, Erik Lahnsteinii.

Erik Lahnstein
Foto: Knut Eirik Olsen

- Stádačálli lohpidii váldit bajás dien ášši go lea mátkošteamen dieid guovlluin.

Stádačálli Lahnstein, čuoččuha gal ahte Norgga eiseváldit galget ovddidit guarani dili Brasila eiseválddiide.

- Mii čuovvut dán ášši iežamet ambassades Brasilas. Muhto lea dehalaš ovtasbargat Sámedikkin.

Stadačálli Lahnstein muitala viidasat ahte Norggas lea prošeaktadoaimmat Brasilas mat gusket guarana álbmoga dillái.