Gearretriekti celkkii duomustis, ahte dálá guolástanláhka ráddje menddo olu sápmealaččaide addon vuoigatvuođa iežaset kultuvra hárjehit ja ráddjehusat leat maiddái olmmošvuoigatvuođaid vuostá mat geatnegahttet Suoma.
Anne Nuorgam.
Foto: Veahčajoga guolástangoddiGearretriekti celkkii maiddái ahte stáhta galgá dáid áššáskuhtton olbmuid diggegoluid máksit.
– Dát lea historjjálaš duopmu. Vuosttaš geardde Suoma bealde nannejuvvo, ahte sápmelaččain lea riekti ja vuoigatvuohta eallit sápmelaš eallinvuogi mielde, illusa Anne Nuorgam.
Son lea okta dan njealji áššáskuhtton sápmealaččas.
– Duopmu nanne, ahte mis lea vuoigatvuohta bivdit iežamet ruoktujoga, Veahčajoaga, čilge Nuorgam.
ON-njunuš oakkui almmá lobi haga
Suoidnemánu 29. beaivve jagis 2017 oggo ohcejohkalaččat Anne Nuorgam, Heidi Eriksen ja Kati Eriksen ja Kati 17-jahkásaš bárdni Erke Eriksen lobi haga Veahčajogas Ohcejoga gielddas.
Kati Eriksen, Anne Nuorgam ja Heidi Eriksen vuite dikkis. Dál áigot Suoma eiseváldit duomu guoddalit njuolgga alimusriektái.
Foto: Aslak Pieski / PreassagovvaOkta dáin bivdiin lei guolástanfákta, ja son dat almmuhii Meahcceráđđehussii lobihis bivddus, ja Meahcceráđđehusas almmuhedje ges politiijaide.
– Mii háliideimmet váldot gitta lobihis bivddus, go mii han eat Suoma dálá lágaid mielde oačču lobi bivdit jogaideamet. Dál beassat ášši doalvut duopmostuoluide, ja dakko bokte rievdadit lágaid, lohká Nuorgam NRK Sápmái.
Nuorgam lea Veahčajoga oasusgotti ságadoalli ja Ovttastuvvon Našuvnnaid bissovaš álgoálbmotforuma várreságadoalli. Kati Eriksen lea gis searvvi čálli. Heidi Eriksen lea oasusgotti ovddit ságadoalli.
Guoddaluvvo njuolgga alimusriektái
Duopmu mearkkaša, ahte ovttaskasolbmot sáhttet joatkit bivddu Veahčajogas almmá rihkokeahttá lága.
– Mis ii leat lohpi bivdit gos beare, muhto namalassii iežamet ruoktujogas, deattuha Nuorgam.
Ášši sáhttá moatti jagi geažes boahtit Suoma Alimusrievtti ovdii. Jus Alimusriekti lea ovttaoaivilis gearretrivttiin, de sáhttá das leat stuorra mearkkašupmi Deanu guolástannjuolggadusaide.
Foto: Bilde; Scanstockphoto/viorel simaÁššáskuhtti lea jo váldán oktavuođa dan njealljásiin geat dál vuite dikkis. Eiseváldit áigot ášši váidit njuolgga Alimusriektái. Dás lea sáhka nugohčoduvvon «prejudikáhta» váidaleamis.
Dalle ášši njuike Hoavvarievtti badjel ja manná njuolgga Alimusriektái.
– Dalle boahtá dakkár «prejudikáhta-mearrádus», man vuođul de sáhttá rievdadit lágaid vai dat heivešivčče gearretrievtti riektedulkomii, čilge Nuorgam.
Dát sáhttá mearkkašit, ahte Deanu guolástannjuolggadusat maid fertejit rievdaduvvot.
