- Beaivváš dat han lea nášuvnnalaš teahter buot riikka sápmelaččaide.
Dalle lea dehálaš ahte bargosadji lea buorre bargiide nu ahte dat čájáhusat maid sii ráhkadit, leat buorit, lohká Midtun.
- Boares visti
- Otne lea anus kulturvisti mii dalle huksejuvvui áibbas eará atnui, ja sii han dárbbašit vistti mii lea buorebut heivehuvvon teahterbargiide, mii livčče dehálaš dákkár dáidda- ja kulturteahterii, lohká Midtun.
- Buoret hárjehallan sadji
Go jearan manne Guovdageidnui hukset go teahter han galgá bálválit olles sámeálbmoga miehtá Sámi, de fástida Midtun ahte Guovdageaidnu lea buorre báiki dasa.
- Guovdageaidnui šaddá maid ođđa Dieđavisti ja teahtervisti heive maid hui bures dohko.
- Latnja- ja duktadárbu gárvvis
Dál lea stivra gárvvistan latnjadárbbuid ja tomta- dahje duktasaji ja go sii hálidit sirdit teahtera jiekkis dohko dievvái gos Sámi Radio kontovra ge lea otne.
Sii leat lohkan stáhtačállái Randi Øverlandii ahte teahtervistti áinnas sáhtášii geavahit maiddái eará atnui go dušše teahterii.
- Visti eará dárbbuide maid
Sii oidnet maid ahte Guovdageainnus livčče dárbu govvadáidagii fidnet saji ja nu han livčče vuogas oktii časkit muhtun dárbbuid dán oktavuođas, oaivvilda Midtun.
- Departemeanta bargagoahtá
- Stahtačálli Randi Øverland lea lohpidan bidjat iežas fágaolbmuid geat galggašedje bargat viidásabbot áššiin ja plánáiguin. Dalle šáddet dieđusge geahčadit dan latnjahámi maid sii leat ráhkadan, lohká Midtun.
- Ii Sámediggái
Sámediggevárrepresideanta Johan Mikkel Sara ii leat ovttaoaivilis ahte Sámediggi dat galgá vuoruhit ruhtadeami dán vistái.
- Nu go Nuortalaččaid musea, Sámi Dáiddamusea ja Beaivváš teahtervisti eai galgga seaguhuvvot Sámedikki vuoruhanlistii, go dat leat čielga nášuvnnalaš ovddasfástádus hukset daid. Nu leamaš Sámedikki oaidnu dás, lohká Sara.
