Lávvardaga galgá Torgeir Vassvik doallat diibmosaš konseartta
riikkaidgaskasaš festiválas Santiago de la Compostela nammasaš gávpogis Spánias.– Illudan hui, hui sakka, lohká Vassvik.
.
Muhto dušše Torgeir Vassvik galgá WOMEX festivála lávddi ala, mii rehkenastojuvvo leat máilmmi deháleamos máilmmimusihkkameassu.
- Loga maid:
Vuovdalit sámi musihka máilbmái
Vassvikas guhte lea eret Gáŋgaviikkas Nuorta-Finnmárkkus, lea earenoamáš vuohki mo láhttet lávddis. Kievrras ovdanbuktinvugiin son lodnulastá luđiid, rumbbuid, sibirialaš čottalávluma ja luonddu jienaid.
Nuppelot sámi artista ja komponistta leat miehtá dán vahku festiválabáikkis márkanfievrrideamen sámi musihka ja luđiid.
Festiválas sii doivot čatnat oktavuođa eará álgoálbmogiin. Ulbmil lea boktit eambbo beroštumi sámi musihkkii ja luđiide nu ahte dat gullošgoahtá miehtá máilbme.
Váttis čuolbma
Sámi Komponisttaid Searvvi jođiheaddji Elin Kåven lea hui rámis dainna go Torgeir Vassvik beassá lágidit sierra konseartta daid doaluin.
– Jahkásaččat leat máŋga čuođi artistta geat ohcet festivála lávddiide, nu ahte lea váttis beassat dan čalmmi čađa, čilge Elin Kåven.
Lea sierra jury mii vállje artisttaid dáid konsearttaide, ja Torgeir Vassvik lea vuosttaš sámi musihkkár guhte goassige lea válljejuvvon.
– Danin dát dieđusge lea stuorra dáhpáhus, maiddái sámi musihkkii, lohká Kåven.