Juohke giđa de bihkkada Hans Oliver Hansen fatnasiid maid ieš lea dahkan. Hansa ássá Goarahagas Porsáŋgguvuona oarjjabealde. Unnimusat oktii jagis son bihkkada fatnasiid ja dan son dahká giđđat.
Vahca lea hui buorre
Jos fal giđđat vel muohtesta de dahká dat ahte bihkka johtilit goiká ja vahca mielddisbuktá ahte bihkka bures vel garrá. Lea dehálaš bihkkadit fatnasa amas dat ii goikka dahje mieska ja iige ádján eanet go guokte beaivve ovdalgo bihkka lea goikan lohká Hansa.
Ieš son lea oahppan
Hansa dahká ieš fatnasiid ja muitala ahte ii giige su gal leat oahpahan daid dahkat. Son lea lohkan ollu girjjiid ja ain riŋgestan daid moaddásiidda geat ain máhttet dahkat fatnasiid go lea dárbbašan veahkki. Dáid guovlluin lea fanasdahkančehppodat bures muddui nohkan, Dat maŋimuš fanasdahkkit ásse Čáskilis ja leat gollan 50 jagi juo das rájes go dat maŋimuš fanasdahkki doppe jámii.