NRK Meny
Normal

Deanučázádaga guolástanhálddahus ii searvva

Deanučázádaga guolástanhálddahus lei bovdejuvvon searvat Deanučázádaga bivdonjuolggadusaid hábmenbargui, muhto leat dql čálalaččat dieđihan Dálkkádat- ja birasministtar Vidar Helgesen:ii ahte eai searvva njuolggadusaid hábmenbargui.

Steinar Pedersen ved Tanabredden

Deanučázádaga guolástanhálddahusa jođiheaddji, Steinar Pedersen ii loga sáhtit searvat njuolggadusaid hábmet dakkár šiehtadusa vuođul man ieža eai doarjjo.

Foto: Nils Henrik Måsø / NRK

Deanučázádaga guolástanhálddahus lea čálalaččat dieđihan Dálkkádat- ja birasministtar Vidar Helgesen:ii ahte sii eai searvva njuolggadusaid hábmenbargui.

– Mii eat sáhte searvat bargui hábmemis njuolggadusaid dakkár šiehtadusa vuođul man mii eai doarjjo, ja go vel diehtit ahte báikkálaččat lea stuorra vuosteháhku soahpamuššii. Dan dadjá Deanučázádaga guolástanhálddahusa jođiheaddji, Steinar Pedersen.

Behtohallan ja hirpmahuvvan

Finnmárkku fylkkadikki ovttajienalaš cealkámušas, mii dál hui gieskat lea mearriduvvon, daddjo ahte Finnmárkku fylka lea hirpmahuvvan ja beahtahallan go Norgga ráđđehus juo lea vuolláičállán Deanusoahpamuša Suomain. Lei Finnmárkku Gurutbellodaga fylkadiggeáirras, Trine Noodt, guhte oaččui ovttajienalaš fylkadikki doarjut cealkámuša. Dán čállá áviisa Ságat.

Viiddis vuosteháhku

Deanučázádaga guolástanhálddahus čállá reivves ahte sii eai sáhte searvat dán abrgui, ja čujuhit dasa ahte šattašii hui imáš jus sii álggos vuostálastet soahpamuša, nu movt eará ge leat dahkan, ja nuppe dáfus servet hábmemis njuolggadusaid soahpamuša hárrái man sii eai doarjjo, dadjá Steinar Pedersen.

Mearriduvvo vuordimis ovdal juovllaid

Finnmarksbenken i Stortinget

Sihke unnilohko- ja anetlohkobellodagain lea vuostáháhku Deanusoahpamuša dohkkehit.

Foto: Montasje/NRK

Ovdalaččas leat maiddái Finnmárkku stuorradiggeáirasat, Frank bakke Jensen (Olgeš), Helga Pedersen ja Kåre Simensen (Bargiidbellodat), Jan Henrik Fredriksen (Ovddádusbellodat) ja Kirsti Bergstø (Sosialisttalaš Gurutbellodat) čállán reivve Dálkkádat- ja birasministara Vidar Helgesenii, mas bivde šiehtadusa hilgojuvvot. Seamma lea Finnmárkku fylkadiggi ja Sámediggi cealkán.

Ovddádusbellodaga, Jan Henrik Fredriksen dadjá ahte sin doaivva lea ahte Stuorradiggi beassát meannudit Deanusoahpamuša ovdal juovllaid.