NRK Meny
Normal

Deanu sátnejođiheaddji: - Lihkus ii oktage duššan

Deanu sátnejođiheaddji lea ilus go manai bures dan viđa guolásteddjis geat ledje fatnasis mii vuojui mannan ija Barentsáhpái.

Frank Ingilæ på ordførerkontoret

Deanu sátnejođiheaddji Frank Ingilæ dovdá bures guolásteaddjiid geat ledje Deanu fatnasis mii vuojui mannan ija garra dálkki geažil.

Foto: Nils Henrik Måsø / NRK

Laster kart, vennligst vent...

Fatnasa posišuvdna lei sullii 60 nautalaš miilla davábeale Báhcavuona Nuorta-Finnmárkkus.

– Go gullen lihkohisvuođa birra otná iđit, de dat duođaid galmmistahtii čielggi, lohká sátnejođiheaddji Frank Ingilæ.

«Østbanken» nammasaš Deanu guolástanfanas dat lei mii fáhtehalai garra dálkái mannan ija sullii 11 miilla davábeale Báhcavuona Nuorta-Finnmárkkus.

Davvi-Norgga váldogádjunguovddáš sáddii 330-skvadrovdna helikoptera lihkohisbáikái dalá maŋŋá go dieđu ožžo. Guolásteaddjit gáddjojuvvojedje veháš badjelaš guđa áiggi otná iđit. Buot viđas ledje gádjunfatnasis gosa ledje ferten vuodjat maŋŋá go guolástanfanas vuojui.

– Guolásteaddjit leat dál Hámmárfeastta buohcceviesus, ja buohkat leat buorre vuoimmis, muitala Davvi-Norgga Váldogádjunguovddáža preassavákta Frode Iversen.

Deanu guolásteaddji: – Issoras vásáhus

Einar Johansen

Deanu guolásteaddji Einar Johansen: - Deháleamos lea ahte ii oktage duššan. Fatnasa gal lea vejolaš fas skáhppot.

Foto: Nils Henrik Måsø, NRK

Maiddái Deanu gielddastivrraáirras, Einar Johansen, guhte ieš lea leamaš ámmát guolásteaddji, lea ilus go manai bures guolásteddjiiguin.

– Dieđán bures ahte ii leat álki leat dákkár roasuid siste, vástida Einar Johansen.

Son lea ieš guovtte gearddi vásihan go fanas lea vuoddjugoahtán garra dálkki geažil.

– Váikko ollu ahkidis jurdagat jorret oaivvi siste justa dalle, de seammás lea bággu garret oaivvi, Johansen čilge.

Doaivu ahte eai ballá mearas

Maiddái songe dovdá deatnulačča guhte eaiggáduššá fatnasa mii vuojui mannan ija.

– Doaivvun ahte sus ja su bargoskihpáriiguin manná bures, Johansen lohká.

Ieš dovdá máŋga guolásteaddji geat máŋgga jahkái eai leat šat duostan mannat meara ala maŋŋá dákkár lihkohisvuođa.

– Buohkat eai leat seammaláganat. Dákkár vásáhus sáhttá čuohcat olbmo millii. Nubbi sáhttá gierdat eambbo go nubbi. Dattege lea dehálaš ahte buohkat ožžot dan dearvvašvuođaveahki maid dárbbašit, Johansen oaivvilda.