Eret
Eret lea dakkár sátni man dávjá heivehat cealkagii skandinávalaš gielaid málle mielde. Go leat muitaleamen guđe guovllu/báikki olmmoš duot dát lea, de dadjalat omd. Máren Olsen Deanus eret vuittii ikte. Manne ii baicca heivehit sáni eret sámegiela málle mielde, ja ráhkadit relatiivacealkaga (oalgecealkaga):
1) Máren Olsen gii lea Deanus eret, vuittii ikte...
dahje
bidjat gullevašvuođa olbmo nama ovddabeallái:
2a) Deanu nieida Máren Olsen vuittii ikte...
2á) Deanu nisu Máren Olsen vuittii ikte...
3) Deatnulaš Máren Olsen vuittii ikte...
Eará maŋŋeattribuhtaid birra sáhtát lohkat omd. Pekka Sammallahti girjjis Láidehus sámegiela cealkkaoahpa dutkamii, s. 160-161. Davvi Girji, Kárášjohka 2005.