Deanu gieldda sierravuodjinlobiid politihkken ja áššemeannudeapmi cuiggoduvvo dál gárrasit dárkkistanrapporttas, maid gielda ieš lea diŋgon. Earret eará meannudit sullasaš ohcamušaid iešguđetgeláhkai dan mielde gii deaivá leat áššemeannudeaddjin.
Ii čuovo lága
Deanu gielda lea okta gielddain main sierravuodjinlobiid addin lea cuiggoduvvon. Gielddastivra dáhtui danin dárkkistanlávdegotti guorahallat sierravuodjinlobi juohkima Deanus. Ja rapporttas celko čielgasit ahte Deanu gieldda sierravuodjinlobiaddin ii leat lága mielde, ja ahte disp:alávdegottis ii ráddje vuodjinlobiid nu movt galggašii.
140 ohcama vissis áigodagas leat geahčaduvvon. Dain ožžo 133:s sierravuodjinlobi. Erenoamažit sii geat ohce bievlavuodjinlobi, oažžo dadjat juo buohkat, 89s ohce ja 88s ožžo. Dát vuodjinlobit lea addon váikko daddjo čielgasit meahcástanlágas ahte galgá leat hui várrogas addit bievlavuodjinlobi.
Meannudit áššiid iešguđetládje
Muhto ii leat dušše dispalávdegoddi mii cuiggoduvvo. Rapporta cealká maiddái ahte muhtumin orru leat deháleappo gii lea áššemeannudeaddji, go ahte makkar áššis lea sáhka. Áššemeannudeaddjit leat seammálagan áššiid meannudan iešguđetge láhkai, ja daddjo ahte ferte váruhit ahte gielda čuovvu dábálaš áššemeannudannjuolggadusaid.
Deanu ráđđealmmái Jørn Aslaksen lohká sivva guđetge áššemeannudemiide lea go sii leat čavgen dispajuohkima dađistaga go leat cuiggoduvvon filkkamánnii.
Gánnáha juoŋastit
Muhto váikko áššemeannudeaddjit leatge válbmen ášši disp:a lávdegoddái, de lea lávdegoddi dávjá hilgon ášši. 43 háve lea lávdegoddi hilgon áššemeannudeaddji evtttohusa.
Rapporta čájeha maid ahte lea okta ágga maid lea gánnáhan geavahit Deanus jus áigu sierravuodjinlobi, ja dat lea ahte áigu juoŋastit. Buot earret okta ohcan lea addon.
Deanu dispalávdegotti Inge Kristian Nilsen ii ástta adit jearahallama Sámi Radioi, muhto lohká kommentáras sii gal lávdegotti bealis čuvvot meahcástanlága, ja eai loga veadjit maidege dasa go hálddahus moive ohcamiidguin.
Dárkkistanlávdegotti rapporta galgá ihttin Deanu gielddastivrra ovdii.
