Hástalus gárvet Nuortasámi musea

Deanu- ja Várjjat museasiidii gullet njeallja musea, mat leat Deanu-, Nuortasámi-, Savio- ja Várjjat musea. Stuorámus hastalus lea oažžut Nuortasámi musea rahpan láhkai, go dat lea sakkaláhkai vuorjan stivrra go ii leat meinnestuvvan gárvvistit musea nu ahte dan leat beassab rahpat, lohká Deanu- ja Várjjat museasiidda stivrrajođiheaddji Steinar Pedersen.

Ii duosta dajat rahpamis maidige

Pedersen ii loga stivrra duostat dadjat Nuortasámi musea rahpamis maidige dál álggogeahčen jagi, go doppe leat ain olu váilevašvuođat. Statsbyggas dat lea ovddasástádus divodit dálu nu ahte šattšii dohkálaš musea doibmii.

Sis-áibmorusttet guozaha rahpama

Hastalus dál lea dat go sis-áibmu ii leat dálus nu go galggašii leat, danne eai sáhte dávviriid bidjat dállui. Dávviriidda gáibiduvvo riekta sis-áibmu, de danne ferte áibmorusttet vuos leat dakkár dilis ahte dokko sáhttá bidjat dávviriid sihke rádjaui ja čájáhussii.

Norgga Álbmotmusea dat gáibida ahte sis-áibmu galgá leat riekta ovdalgo luiket dávviriid čájáhussii. Dál lea áinnat nu ahte Norgga Álbmot Musea dat eaiggádušša dávviriid maid museat ožžot čájáhussii.

Rahpan maŋiduvvon máŋgii

Álgo álggus lei sáhka das ahte dát musea áigo rahpat 2009is, muhto de reasttaluvai huksenfitnodat, ja de goaikugođii dálu rohppi ja seammás fuomášišgohte eará váilevašvuođaid.

Musea siidda eará museat doibmet bures

Muđui gal doibmet dat eará museat museasiiddas nu go galget, muitala Deanu- ja Várjjat museasiidda stivrrajođiheaddji Steinar Pedersen.