Finnmárkku dearvvašvuohta mearridii njukčamánus sirdit dán guovddáža Kárášjohkii, ja dan ii dohkket Porsáŋggu gielda.
- Dán proseassas leat leamaš váilevašvuođat, eaige sii leat gieldda bealis váldon mielde dán bargui, lohká sátnejođiheaddji Knut Roger Hanssen.
Vuorjašuvvá go fálaldat rievdá
Dasa lassin gielda vuorjašuvvá dainna go fálaldat psyhkalaš buhcciide rievdá dan dihte go Finnmárkku buohcciviessu njukčamánu 20. beaivvi mearridii sirdit Leavnnja guovllupsykiátralaš guovddáža Kárášjohkii.
Bivdet ráđđehusa árvvoštallat ollásit
Sátnejođiheaddji lohká ahte sii leat dieđihan iežaset vuorjašumi birra ja sii bivdet ráđđehusa árvvoštallat mearrádusa lobálašvuođa, ekonomalaš beliid ja áššeproseassa dohkálašvuođa.
Sii áigot maid ovddidit eará beliid áššis, mat oktiibuot dahket ahte sii hirbmosit vuorjašuvvet, ja man vuođul sii leat šaddan dieđihit maid dán vuorjašuvvama.
Porsáŋggu gielda lea ovdal bivdán Davvi dearvvašvuođa, mii eaiggáduššá Finnmárkku buohcciviesu, árvvoštallat earret eará mearrádusa lobálašvuođa, muhto doppe eai vuhtiiváldán Porsáŋggu gieldda oainnu áššis.
Galgá baicca sirdojuvvot
Finnmárkku buohcciviessu baicca nannii maŋemus stivračoahkkimis mannan vahkus ahte Leavdnja guovddáš galgá sirdojuvvot Kárášjohkii.
Porsáŋggu sátnejođiheaddji Knut Roger Hanssen ii hálit dadjat maid oaivvilda dán ektui, dan son áigu njuolga ovddidit ministarii, lohká son.
Dan dihte lea Porsáŋgu bivdán čoahkkima
Finnmárkku buohcciviesu stivrajođiheaddji dat lea dadjan ahte jus dát ášši galgá ođđasit meannuduvvot, de ferte ministtar ieš gohččut dan dahkat.
Dan dihte leage Porsáŋgu bivdán čoahkkima, muhto sii eai áiggo muitalit makkár gáibádusat sis leat ministarii.
- Guldal ášši:
