Dát ii dáidde šat nuvttá boahtteáiggis

Skohtervuoddjit sáhttet boahtte áiggis gártat máksit divada Deanu gildii go vudjet skohteriiguin gielddas. Ná gielda áiggošii skáhppot oktiibuot 500.000 kruvnnu skohtergeavaheddjiin.

Snøskuter

NUVTTÁ: Dál skohtervuoddjit eai dárbbaš máksit maidige gildii vuodjiima ovddas, eai máđijaid ráigge eaige sierravuodjima ovddas.

Foto: Snøskuterklubbens fellesorganisasjon

Gielddastivrra eanetlohku, namma lassii Bargiidbellodat, Sosialisttalaš Gurutbellodat, Árja, Sámeálbmot Bellodat ja iešoaivválaš lahttu Einar Johansen, dat lea ikte bivdán Meahcástan- ja ealáhuslávdegotti árvvoštallat skohterdivatortnega.

– Juohke skohtergeavaheaddji gártá de máksit sullii 300 ruvnnu jahkásaččat, čilge Sámeálbmot Bellodaga (SáB) gielddastivrraáirras Odd Erik Solbakk.

Odd Erik Solbakk og Hartvik Hansen på rådhuset

VUORDIBA REAKŠUVNNAID: Odd Erik Solbakk (SáB) ja Hartvik Hansen (Árja) jáhkkiba čuožžilit garra digaštallamiid gieldda árvalusa hárrái.

Foto: Nils Henrik Måsø / NRK

Árvvoštallet iešguđetlágan mávssu

Son dat jođiha lávdegotti mii lea ožžon barggu árvalit njuolggadusaid mot ollašuhttit áigumuša. Dan oktavuođas galget maid árvvoštallat vejolašvuođa earuhit mávssu gielddaássiid ja olggobeale ássiid gaskka, nie mot Suomas doaibmá.

– Dat soaitá šaddat stuorra hástalussan. Bealistan háliidivččen váldit unnit mávssu gieldda ássiin go earáin. Ohcejoga gielddas leat dušše olggobeale olbmot geat fertejit máksit geavaheaddjimávssu, Solbakk vástida.

Lassiruđain áiggošedje gokčat goluid mat gielddas leat sierravuodjenohcamušaide, máđijaid dihkkádemiide ja divodemiide.

2018 rájes

Dássážii gielda ii leat leamaš vuos makkárge oktavuođas geavaheaddjin ášši hárrái.

Solbakk muitala lávdegotti álggahit barggu ođđajagemánus, ja doaivu ođđa njuolggadusaid gárvánit čakčii.

– Nu ahte dán dálvi gal ain šaddá nuvttá skohtervuoddjin, Solbakk vástida.

– Vearrivuohta

Árjja gielddastivrraáirrasa Hartvik Hansena mielas lea vearrivuohta go earenoamážit olgoriikalaččat besset nuvttá vuodjit máđijaid ráigge.

– Danin fertet gávnnahit ahte lea go EU njuolggadusaid vuođul vejolaš earuhit mávssu gielddaássiid ja olggobealeássiid gaskka. Olgoriikkalaččat galggašedje máksit buot eanemusat, bealistan árvalan 1.500-2.000 kruvnnu jahkásaččat, Hansen árvala.

Doaivvut go ahte dii lehpet láidesteaddjin eará gielddaide maid dán hárrái?

– Dan in dieđe. Muhto Norggas lea juo okta gielda, Hemnes gielda, geavahan vejolašvuođa ráhkadit sierra njuolggadusaid, Hansen vástida.

– Byrokráhalaš bargu

Ođđa mohtorjohtolatláhka addá gielddaide eambbo iešmearridanválddi. Dan oktavuođas gielddat leat ođasmahttigoahtán skohtermáđijaid.

– Dat lea gártan stuorra ruđalaš noađđin gielddaide, oaivvilda Deanu sátnejođiheaddj Frank Martin Ingilæ.

Čáhcesuolu lea ovdamearkka dihtii dássážii geavahan bealle miljovnna kruvdnui ođasmahttinbargguide.

– Nu ahte reviderenbargu ii leat nu álki go stuorradiggepolitihkkárat leat vikkahan, muhto lea hui byrokráhtalaš bargu, Ingilæ vástida.