Dássta dal festiválav dåhkki ásadit.

– Berustav dålusj biebmojt, ja daj barggat, ja de diedon ienebuv oahppat, subtsas akta oasseválldijs Martin Rimpi.

–Dát la mijá kultuvrra, ja dát de muv galggá tjuovvot, ja tjuovvot sijáv gudi de muv maŋen båhti.

Martin Rimpi la oassálasste Ájluovtan Divtasvuonan gånnå biebbmofestiválla dán bále ásadalladuváj.

Biebbmokultuvrav tjalmostahttet

Ja dát la gålmåjahkásasj prosjækta gånnå ulmme l sáme árbbedábálasj biebmov bisodit ja tjalmostahttet, máhtudagáv ja berustimev lasedit. Duodden aj sáme mannoæládusáv Nuortta-Nordlándan ja Oarje-Råmsån åvdedit.

Márkomanno, Árran, Várdobáiki, ja mannoæládusvidnudagá Njunjes Divtasvuonan ja Inga Sámi Siida Soarttán åvddånahtátjit sáme biebbmokultuvrav, mannoæládusáv ja duojev.

Dijmmá ásadalladuváj biebbmofestiválla Skánen, ja dán jage la dal Divtasvuonan.

Ellen Cecilie Triumf la biebbmofestivála generála, ja sunji l dal ájnas sáme biebbmokultuvrav ienep vuojnnusij biedjat.

– Sihtap tjalmostahttet dánna l buorre sáme biebbmokultuvrra. Dat biebbmo mij la mijá gaskan la juoga majt máhttep ålles væráldij vuosedit. Ja dagu mannoæládus máhttá vuobddet dáv biebbmokultuvrav.

– Dát kurssa la dahkkár majt máhtti turistajda vuosedit, jali aj majt ulmutja ietja máhtti dahkat. Munji l gåjt suohtas gå ienep ulmutja vuojnnet biebmov berusti, ja vuojnni dat biebbmo mij la miján, danna l árvvo, ja dav de vierttip ienebuv bårråt ja ietja dahkat ienebuv gå udnátjij.

Árranin lij lávvodagá rabás drop-in kursa ja bierggosuovastuhttem, ja oassálaste aj oadtjun diehtet gåktu bárkov ávkástallat biebbmon, májsstet ja gåktu dahkat.

Ájnas åhpadus mánájda

Kursajådediddje ieme sáme biebmojt riesstijit lij Greta Huuva Jåhkåmåhkes Svieriga bieles. Greta Huuvaj la ájnas dålusj máhtudagáv ja diedojt åhpadit, ja ájnas la aj máná oahppi nav vaj árbbedábálasj biebbmo båråduvvá juohkka biejve.

– Dáv sidáv åhpadit nav vaj ij dáhpe ja máhtudagá gádo, mánájda aj. Ajtu galgajma dáv skåvllågievkanin åhpadit nav vaj máná aj dáv åhpadusáv máhtti gadtsat. Fámilja e desti sæmmi láhkáj ællobargov tjuovo dagu åvddåla, ja nav bæjválasj biebmoj allasisá riejsstemin sæmmi gå åvddåla. Dáv dal dálla dahká gå li lárkkama, ja gå asstit, ja uddni lip mále, libre, tsåge ja vuojŋŋama birra oahppam, ja gåktu dajt máhttá biebbmon ávkástallat. Dahkkár ábnnasa e uddni vuojga aneduvá.