Dárbu jienastuslogu guorahallat
Sámediggi berre guorahallat jienastuslogu, ovddidii eanetlogujoavku sámedikki dievasčoahkkimii.
NSR parlamentalalaš jođiheaddji, Beaska Niillas, čujuhii NRK Sámi ođđasiid jienastuslogu birra gos Terje Wikstrøm, gii otne lea Hámmerfeasta sátnejođiheaddji, dieđihii jienastuslohkui vaikke ii atnán iežas sápmelažžan dan áigge.
Sámediggepresideanta Silje Karine Muotka atná hui duođalažžan jos olbmot dieđihit jienastuslohku vaikke eai deavdde gáibádusaid.
-Sámediggi lea sámi álbmoga parlameanta. Dieđiheapmi jienastuslohkui lea huksejuvvon luohttámuša vuođul. Nu lea hui duođalaš jos dat boastut geavahuvvo ja leat jienasteaddjit jienastuslogus geat eai berrešii doppe leat, logai Muotka.
Presideanta deattuha ahte olbmot jienastuslogus fertejit goappaš eavttu deavdit. Don fertet sihke atnit iežat sápmelažžan ja seammás deavdit dan objektiivvalaš eavttu ahte sámegiella lea dahje leamaš ruovttugiellan unnimusat ovtta du máttarvánhemiin.
Sámediggi galgá čađahit guorahallama gos isket ahte devdet go olbmot jienastuslogus eavttuid ja manne muhtimat ges dieđihit iežas eret jienastuslogus.