NRK Meny
Normal

Dárbbašit ruhtaveahki beassat cup-gilvvuide

– Jus nagadit ruhtadit mátkki, de áigu maid FA Sápmi oassálastit álgoálbmogiid spábbačiekčan cupgilvvuin Abkhazias.

FA Sápmi 2014

Sámi spábbačiekčanjoavku ii beasa oassálastit álgoálbmogiid cup-čiekčamiin jus eai fitne doarvái ruhtaveahki.

Foto: John Einar Eira / NRK

FA Sámi stivrra dat lea bearjadaga mearridan sáddet sámi spábbačiekčanjoavkku Conifa WFC2016 čiekčamiidda Abkhaziai Georgiai, riikii mii lea Čáhppesábi nuorttabeale.

Håkan Kuorak

FA Sámi stivrrajođiheaddji Håkan Kuorak bivdá ruhtaveahki sámedikkiin.

Foto: Sigve Nedredal / NRK

– Mii vástidat juo bovdehussii jus oažžut ruđalaš veahki, muđui eat vuolgge, muitala stivrrajođiheaddji Håkan Kuorak.

Sii leat ožžon áigemeari vástidit bovdehusa ođđajagemánu rádjai. Dassážii fertejit gávdnat ruhtačovdosa.

– Dainna mii bargagoahtit vuossárgga rájes, Kuorak muitala.

– Sámedikkit fertejit veahkehit

FA Sámi stivrra doaivu oažžut ruhtaveahki sihke Suoma, Ruoŧa ja Norgga Sámedikkis.

– Dasa lassin fertet iskat lea go vejolašvuohta fitnet sponsoraid, čilge Kuorak.

Jus eai oaččo doarvái ekonomiija, de ii loga sáhttit sáddet joavkku čiekčamiidda.

Muhto stivrras lea buorre jáhkku ahte ruhta boahtá sadjái dađistaga.

Gilvvut álget miessemánu 28. beaivvi Suhkum-gávpogis. Maiddái loahppačiekčamat galget lágiduvvot seamma báikkis. Dál lea goalmmát geardde ahte Conifa lágida dán máilmmicupa.