– Dáppe lea somá. Mun oainnat liikon čiekčat spáppa. Áiggun joatkit bargat garrasit vai šattašin buoret, lohká Daniel Ailo Sakshaug Bær.
17-jahkásaš lea jo nuppi jagi Romssa Valáštallansearvvi akademiijas. Dáppe son vázzá joatkkaskuvlla seammás go hárjehallá spáppa čiekčat.
Romssa Arenas lea nu gohčoduvvon njunušvaláštallan joatkkaskuvla, NTG.
Dáppe lea oahpahus erenoamážit heivehuvvon, vai oahppit ožžot vejolašvuođa sihke hárjehallat ja vázzit skuvlla.
Dan beaivve go NRK finai Romssa Arenas lei joavku hárjehallamin bearjadaga čiekčamiidda Molde vuostá.
– Mu vuosttaš mihttomearri lea vuos beassat bissovaččat čiekčat A-joavkkus, čilge Bær.
– Falli ja spábbačiekčangállu
Bær čiekčá eanaš Romssa Valáštallansearvi B-joavkkus 4. divišuvnnas.
Dalle go son bođii sisa lei Romsa ovddabealde 3-0. Sii vuite 6-0.
OLU RÁPMI: Romssa valáštallansearvvi hárjeheaddjis, Jørgen Vik, leat olu čáppa sánit dadjat Daniel Áillo birra. – Daniel Ailo galgá joatkit hárjehallat bures ja ahtanuššat. Seammás berre muitit, ahte eai nu galle vuollel 20-jahkásaččat beasa bissovaččat A-jovkui, muittuha Vik.
Foto: Dan Robert Larsen / NRKHárjeheaddji Jørgen Vik lohká, ahte Daniel Aillos leat máŋga miellagiddevaš attáldaga maid sii dárbbašat A-joavkkus. Sus lea buorre spábbačiekčangállu.
– Son lea hirbmat falli viehkat. Son lea čeahppi gávdnat saji ovddabealde. Sus lea stuorra potensiála ravdasuodjalusčiekčin. Sus lea buorre juolgi guossohit spáppa fallehančiekčiide, lohká Vik.
– Buorre gullat. Dat addá munnje eambbo energiija dál ovddosguvlui bargat, dadjá Bær ja mojohallá.
BAJIMUS DIVIŠUVNNAS: Romssa Valáštallansearvi lea Norgga elihttaráiddus. Diibmá sii bohte goalmmádin. Dán jagi sii leat rahčamin vuolimusaid searvvis.
Foto: Dan Robert Larsen / NRKDaniel Ailo Sakshaug Bær lei 16 -jahkásaš go bođii Romsii ja Romssa Valáštallansearvvi akademiijai.
– Álggus gal ledjen veahá balus. Áiggi mielde lea šaddan dušše buoret aht` buoret. Liikon dáppe Romssas orrut. Mus leat olu skihpárat dáppe. Mun lean hui bures váldon vuostá dáppe, muitala Bær.
– Buorre oktavuohta davimus klubbain
Daniel Ailo Sakshaug Bær ii leat dat áidna sámegánda gii čiekčá Romssa valáštallansearvvi ovddas.
Eará dovddus sámi čiekčit leat Čáhcesullos bajásšaddan Morten Gamst Pedersen, Hášttáin riegádan Tom Høgli, ákšovuotnalaš Magnus Andersen ja Kárášjogas bajásšaddan Hans Norbye ja Jan Egil Brekke.
BUORIT OKTAVUOĐAT: Romssa spábbačiekčansearvvi akademiija jođiheaddji, Robin Bergfall, lohká ahte sin searvi ii galgga áddejuvvot dego vuovdnás spábbačiekčansearvin.
Foto: Dan Robert Larsen / NRKRomssa Valáštallansearvi bargá máŋgga láhkái go ohcet ođđa taleanttaid.
- Searvvis leat ovttasbargosoahpamušat máŋggain klubbain.
- Dáid soahpamušaid vuođul earret eará lonohallet vásáhusaid.
- Dasa lassin leat klubbagalledeamit, maid oktavuođas leat hárjeheaddjiidforumat, spábbačiekčanskuvla, hárjehallančoagganeamit, ja nu ain.
– Min searvvis lea dan láhkái, ahte eará klubbat sáhttet min boahtit galledit. Nu čilge Romssa spábbačiekčansearvvi akademiija jođiheaddji, Robin Bergfall.
Davvi-Norgii mearkkaša hirbmat olu Romssa valáštallansearvái. Searvvi lihkostuvvan lea hirbmat olu dan duohken, ahte sis leat buorit oktavuođat eará klubbaide.
– Mii dovdat dán guovllu bures, muhto mii sáhttit ain šaddat buoret. Máŋga klubba leat čeahpit veahkehit min. Klubbain leat máŋga resursaolbmo, geat leat čeahpit minguin gulahallat, rámida Bergfall ovttasbargoguimmiideaset.
OLU USTIBAT: Daniel Ailo Sakshaug Bær lohká alddis olu ustibat Romssas.
Foto: Dan Robert Larsen / NRKDaniel Ailo Sakshaug Bær lea ilus go dál beassá fargga finadastit smávva mohki ruovttus Kárášjogas.
– Mus leat olu skihpárat ruovttus maid. Ja dál han fargga lea geasseluopmu. Áiggun deaivat daid skihpáriid ruovttus, muitala Bær ja mojohallá.
