Dán jagi Porsáŋgulaš jođiha revyjoavkku ja lávlu

Porsáŋggu gielddastivra mearridii cuoŋománus ovttajienalaččat juohkit jagi 2015 Porsáŋgulaš bálkkašumi Kjell Johansenii. Kjell Johansen oaččui bálkkašumi danin go son lagabui 40 jagi viššalit lea bargan iešguđetge servviid ja lihtuid ovddas. Johansen jođiha maid revyjoavkku ja lávlu koaras.

Kjell Johansen

Kjell Johansen

Foto: Arne Ivar Johnsen / Nrk

Jagi 2015 Porsáŋgulaš, sápmelaš ja kvena Kjell Johansen, lea Bløgg nammasaš revyjoavkku jođiheaddji ja dán jovkui son searvvai juo dalle go joavku vuođđuduvvui 1991:s. Kjell Johansen lea maid mielde Porsangerne lávlunkoaras ja son oassálastá velge eará koarain Finnmárkkus, lohká Porsáŋggu gieldda sátnejođiheaddji Aina Borch.

Porsangerne

Porsangerne Porsáŋggu ráđđeviesus gieskat

Foto: Bengt Danielsen

Bálkkašupmi mearkkaša ollu

Lea duođaid gudni beassat juohkit jagi Porsáŋgulaš bálkkašumi go dat han lea dehálaš rámidit olbmo- dahje olbmuid geat barget servvodahkii buorrin, lohká sátnejođiheaddji Aina Borch. Jagi 2015 Porsáŋgulaš Kjell Johansen lohká ges ahte sutnje lea stuorra illu oaččut dákkár bálkkašumi go dat han muitala ahte earát leat fuomášan dan barggu maid son guhkká lea doaimmahan. Son giitá vel árvalusa vuolggaheaddji ja Porsáŋggu gielddastivrra dán mearrádusa ovddas. Bálkkašumi vuoitu lea 10 000 kruvnna ja dáid ruđaid ovddas áigu son fitnat Davvi-Norgga revyfestiválas ja eará revydoaluin davvin.