– Ådå ræjdo lij dal viehkken, valla huoman hæhttuv madij milta vaj iv viermijt galga gajkkot.
Dav javllá Divtasvuona guollár Einar Pedersen (75) guhti l viessomájgev guollidam, ja guhti vuonav dåbddå dagu ietjas buoŋav.
Dálla javlaj åvddåla la bálldáv bivddemin, ja giehttu dålusj merkaj ja madij birra man milta de viermijt suohpudin.
– Dålen adnin madijt man milta de guollidin, ja da dålusj merka lij dal buoraga diehtet dálla aj, juska dal dálla adnep remedajt majna åhtsåp, ekkolåtta rájes ja divna dale dajt. Valla dålen dal ettjin dajt ane. Dåssju merkajt adnin. Dálla dal aj adni dajt merkajt. Ja gå dajt aná, da aj diehtá gånnå nievres bådne lij, jus lij gålo ja nav.
– Moaddi de vájvástuvvap gå li nievres saje. Dajnas de agev åhtsåp buorep sajijt. Nievres båddne dal viermijt gajkku.
– Ij gåjt ájn bæjo, javllá Einar Pedersen gå báldesviermijt guovllá.
Foto: Sander Andersen / NRKÁlkke teknihkalasj rustaj
Einar Pedersen de vilá várij ja njárgaj ja ietjá dåbddomerkaj milta sivtostallá gånnå l, ja gåsi galggá suohppot.
Ja juska li kárttasæjnnusa, ekkolåtta, rádára ja nav, de huoman Einar Pedersen madij milta manná gå la dagu báldesviermijt suohppomin.
– Hæhttu dal gæhttjat gånnå la. Juska dal dale dajt teknihkalasj viehkkenævojt adnep sjievnnjedin ja bållåsin gávnnat gåsi galga. Dat la má álkke. Valla huoman hæhttup gæhtjat madijs gånnå. Ep dal máhte dagu Girvasbáktáj suohppot bálldáj gånnå l bákte njuolgga vuolus 250 sallaj avta bále.
Salá ja slábe
Báldesviermij giesedahttijn Einar Pedersen giehttu gåktu sån guhkkudagájt ja tjiekŋalisájt riekni. Ja sån dal salájt ja slábijt låhkå juogu dal man stuorak la vanntsa, makta l tjiekŋal jali man guhkke allá ja viermme l.
Ja juska l dal Einar Pedersen navigátørra, ja dav åhpadusáv la gadtsam gånnå lidjin miehtara, de salájt iesj låhkå ja riekni.
– Mij lip dal hárjjánam salájda. Valla gå navigasjåvnnåj gehtja, da ep guolástusán máhte fåvtåjt ja miehtarajt rieknit, de kåmmålasstep. Mij dal adnep dav dålusj teknihkav.
– Vuojná dálla, gå aláv gávna, de li miehtara. Mån dal dav dalá sallan riekniv. Ietján ij maná.
– Galle l dal bálldájs. Gatjálvis la jus dal værmmáj suokŋá, javllá Einar Pedersen tjajma.
Foto: Sander Andersen / NRKGitta jalggaj
Giesedahttijn la dal agev geldulasj jus báldes la dæhppum ja man tjiekŋalisán la. Bálldá l dal lassánam dájt maŋemus jagijt, ja Pedersen ij máhte subtsastit manen la nav sjaddam.
– Ij dav diehttu. Ihtám la gåjt juohkka sajen. Oadtjot dav la de væráp. Vuojnáv gal då ráddnávantsa suohppum li guovte gærddáj ienep viermijt gå mån, ja huoman luodju. Valla dán tjavtja le ållo bálldá.
– Dánna la dal 210 salá tjeikŋal, valla suohppop dájt 70-80 salla tjiekñalisás vuolus gitta jalggaj.
Ådåjagijda vat ietjá
Einar Pedersen la ávon gå báldes viermen gissjvur, ja sån dal åvddålijguovlluj gæhttjá gå ådåjagijda vat nuorráj galggá. Dalloj la silldá. Ja de jáddi.
– Mån iv máhte dájna hiejttet. Dát la muv iellemvuohke. Ja dat la má buoremus.
