NRK Meny
Normal

Dálkudiddjekontåvrrå ij hiejteduvá – valla muhtem gássjelisvuoda li

Viesáda Ájluovtan Divtasvuonan li maŋemus ájgev árvvádallam Ájluovta dåktårakontåvrrå dal hiejteduvvá. Ij la duohta, valla gássjelisvuoda li.

Drag Legekontor

Dálkudiddjekontåvrrå Ájluovtan bisoduvvá.

Foto: Simon Piera Paulsen / NRK

– Le gus duohta dálkudiddjekontåvrrå hiejteduvvá biehtsemáno 1. biejve?

Dav gatját viesát Ájluovtas Facebook-bielen gånnå Divtasvuona politihkka birra dágástaláduvvá.

Suohkanoajvve dal tjuottjodusájt duosstu, ja viesádijt jaskat.

– Suohkanin ælla plána dálkudiddjekontåvråv Ájluovtan hiejtedit, javllá suohkanoajvve Tor Asgeir Johansen NRKaj.

Valla muhtem gássjelisvuoda li.

Tor Asgeir Johansen

Suohkanoajvve Tor Asgeir Johansen (Ap) dættot e dálkudiddjekontåvrrå hiejteda.

Foto: Sander Andersen / NRJK
Filip Mikkelsen

Aktisasjlista Filip Mikkelsena mielas la lájttális dille badjánam.

Foto: Simon Piera Paulsen / NRK

– Lájttális

Dille varresvuohtasuorgen Divtasvuonan ij la dal bælostahtte biehtsemáno 1. biejve rájes, tjálij politihkkár Filip Mikkelsen girjen suohkanoajvváj dá vahko, ja tjuottjodij:

  • Suohkanin li dåssju guokta dálkudiddje boahtte máno rájes. Dálla li gålmås.
  • Ij la tsaggeieddne allebielen.
  • Ij la varresvuohtasujtár allebielen.

– Muv mielas de la dát lájttális.

– Ij la lájttális

Suohkanoajvve Tor Asgeir Johansen la Mikkelsena girjev vásstedam, ja dilev náv tjielggi:

  • Goalmát dálkudiddjev ep la ájn virggáj biedjam danen gå li gássjelisvuoda jåksåt suv gev virggáj sihtap. Båddåsattjat sadjásasjvidnudagás lájggip.
  • Miján la avta árabut tsaggeiednijn båddåsasj sjiehtadus biehtsemáno maŋŋegæhtjáj, ja sån la javllam sån la mielos sjiehtadusáv guhkedit. Valla tjuovvolimdievnastusán miján ij la tsaggeieddne.
  • Mij lip varresvuohtasujttárav 50% virggáj biedjam Divtasvuona allebælláj, ja álgij moarmesmáno 10. biejve. Duodden de varresvuohtasujtár lullebieles aktij vahkkuj Ájluovtan barggá.

– Dáj diedoj milta de iv máhte javllat dát la lájttális dille, tjállá suohkanoajvve Tor Asgeir Johansen Filip Mikkelsenij.