NRK Meny
Normal

Dálki váikkuha Árktalaš dálveriemuide

Árktalaš dálveriemuid rahpandoalut mat leat sotnabeaivve maŋiduvvojit gávcciin diimmuin, go lea dieđihuvvon suhkkes borga Ruonáeatnamii.

Team Sápmi, AWG 2012 åpningsseremoni

2012 Árktalaš dálveriemuid rahpandoalut.

Foto: Dan Robert Larsen / NRK

Árktalaš dálveriemut lágiduvvojit njukčamánu 6.beaivves njukčamánu 11. beaivái Ruonáeatnama oaivegávpogis Nuukas. Árktalaš dálveriemut leat valáštallan- ja kulturriemut árktalaš guovllu nuoraide, ja riemut lágiduvvojit juohke nuppi jagi.

Dál šaddet maŋidit ráhppandoaluid go lea dieđihuvvon garra dálki, dieđiha Sermitsiaq áviisa.

– Dá lea dábálaš hástalus Ruonáeatnamis. Muhto go dálki hástala min, de čovdosa mii gal gávdnat. Mis leat olu eaktodáhtolaččat geat leat barggus ja mii gal lihkostuvvat, lohka Árktalaš dálveriemuid jođiheaddji Maliina Abelsen.

NRK Sápmis AWG-team

NRK Sámi AWG-joavku leat gergosat dieđihit Ruonaeatnamis. Nils John Porsanger, Dan Robert Larsen ja John Einar Eira jr.

Foto: NRK Sápmi

Maŋiduvvojit gávcciin diimmuin

Dálveriemuid jođiheaddjit leat mearridan maŋidit sotnabeaivve rahpandoaluid. Rahpandoalut galge álgit sotnabeaivve njukčamánu 6.beaivvi diibmu 12.00 báikkálaš áigge, muhto sirdojuvvojit dál diibmu 20.00 báikkálaš áigái.

Ruonáeatnamis lea diibmu njeallje diimmu maŋŋelis go Norggas, dat mearkkaša ahte rahpandoalut álget gaskaija 24.00 Norgga áiggis. NRK Sápmi streame AWG-rahpandoaluid NRK sámi neahttasiiddus. Ruonáeatnama mediaásahus Kalaallit Nunaata Radioa (KNR) lágida rahpandoaluid TV:i. Sátta lea diibmu 2400 gitta diibmu 02.00 rádjái.

Lea earenoamáš stuora našunála beroštupmi Árktalaš dálveriemuide go ruvdnaprinsa Fredrik boahtá Ruonaeatnamii . Gonagaslaččat leat hui dehálaččat Danmárkkus ja Ruonaeatnamis.

Heahtečoavddus

Maiddái valáštallandoaimmat maŋiduvvot dálkki geažil.

– Eat mii mearrit dálkki, mii dál vurdojuvvo. Mii leat bargame heahtečovdosiin, ja lean duhtavaš go buot ovttasbargoguimmit ulbmil lea lihkostuvvat, dadjá Abelsen Sermitsiaq áviisii.

Dálki nai čuohcá girdijohtolahkii, ja eai buot joavkkut joavdda rahpandoaluide. Earet eará hockey-valáštallit manahit rahpandoaluid.

Sápmi-joavku lea dál mátkkošteame Ruonáeatnamii, ja sii gal ollejit báikái ovdal go dálkkáska.

På til til AWG

40 sáminuora ja jođiheaddji leat mátkošeame Ruonáeatnamii Árktalaš dálveriemuide. Gurutbealde Hildá Länsman, Kari Margrethe Triumf, Ann-Heidi Utsi ja Ella Hætta Isaksen.

Foto: Dan Robert Larsen/NRK