NRK Meny

Dálki hehtte Arktalaš dálveriemuid

Garradálkkiid geažil eai sáhttán iktege girdit seaivut Kalaallit Nunaata oaivegávpogii Nuukii gos Arktalaš dálveriemut lágiduvvojit. Dat mearkkaša ahte olu valaáštallannuorat ja jođiheaddjit leat šaddan nuppi ija jo idjadit Kangerlussuaqas. Dán unna gilážis leat dál hoteallain, skuvllain ja eará vejolaš idjadanbáilkkiin 1700 eambbo olbmo go dábálaččat. Dálkedieđuid mielde galggašii otne firtet. Sámi valáštallit gal olleje Nuuk gávpogii ovdal go dálkkáskii.