NRK Meny
Normal

Dálkeeinnosteddji: – Muohttá dán mánu loahpas

Meteorologat eai sáhte dábálaččat einnostit dálkki guhkkelii go logi beaivvi ovdasguvlui. Halvdan Nilsen, Gáivuonas Davvi-Romssas, gal lohká oaidnit guhkkelii.

Skyfritt og sol i Kjerringdalen

Beaivvadat ja bievla vuos ain Áhkkávákkis Davvi-Romssas. Dán mánu loahpas dáidá vilggodahttit, árvala báikkalaš dálkeeinnosteaddji.

Foto: Klemet Anders Sara / NRK-Sápmi

Halvdan Nilsen, čohkohallá stobus Áhkkávákkis Gáivuonas ja geahčada albmanáhki.

Son einnostallá makkár dálki šaddá, ja lea dulkon dáid dieđuid dan láhkai ahte navdá muohttit dán mánu loahpas.

Bivvalat bistet

Dálkeeinnosteaddji Halvdan Nilsen

Halvdan Nilsen einnosta ahte muohttá davvin dán mánu loahpas.

Foto: Klemet Anders Sara / NRK-Sápmi

Dán mánu riegáda mánnu guktii. Vuosttáš gearddi 2. beaivvi, ja nuppes ges nubbin maŋemus beaivvi.

– Dákkár dálki bistá goit dán mánu lohpi, ja easka go mánnu nuppes riegáda, loahpas dán mánu, de sáhttá muohttit lohká Nilsen.

Mánnu dehálaš einnosteaddjái

Nilsen oaidná guđe guovllus mánnu riegáda, ja goas dat riegáda.

Dáid dieđuid vuođul sáhttá de einnostit dálkki ovddasguvlui.

– Dál riegádii mánnu oktanuplohkái minuhtta badjel guovttis ihkku, de šaddá nuortadálki, ja lea vuos maid liegga dálki lagamus vahkuid, lohká son.

– Ii boađe vel dálvi

Snøskredvarsler Håvard Thorset

Meteorologa Håvard Torseth ii loga sáhttit oaidnit dálkki guhkkelii go logi beaivvi ovddasguvlui.

Foto: Stig Storheil

Meteorologat sáhttet sullii 10 beaivvi ovddosguvlui addit beanta dárkilis dálkeeinnosteami.

– Davvi-Norggas bistá Ihttážii seamma dálki mii lea leamaš dáid beivviid, muhto maŋŋelgaskabeaivvi ja eahkeda rájes ihttin vurdo lieggasat dálki, ja arvi moatti beaivái Lofuohtas davás, lohká meteorologa, Håvard Torseth.

Son árvala ahte davvin bivalda ihtá rájes gaskal viđa ja gávcci lieggacehkiin. Torseth ii duostta gal dadjat goas dálvi boahta.

– Dálvi ii boađe goit dán vahkkus, iige vel boahtte vahkus, lohká Torseth.

Halvdan Nilsen ja almanahkka

Halvdan Nilsen einnosta dálkki albmanáhkiin.

Foto: Klemet Anders Sara / NRK-Sápmi