NRK Meny
Normal

Dálá njuolggadusat bisuhuvvojit

Finnmárkkus ja Davvi-Tromssas galget gielddat ain beassat addit sierralobi olbmuide mohtorfievrruiguin vuodjimii rabas máđiid olggobeallai.

Snøskuter
Foto: Sigve Nedredal / NRK

Váikko ráđđehusa ođđa mohtorjohtolatláhkaárvalus ii leatge vel gárvvis, de lohpida birasgáhttenminsttar, Erik Solheim, ahte gielddat galget ain beassat juohkit sierra vuodjenlobiid rabas máđiid olggobeallai.

Finnmárkkus ja Davvi-Romssas eai šatta makkárge rievdádusat dálvevuodjima ektui. Olbmot besset vuodjit muohtaskohteriiguin seammaláhkai go dál.

Hartvik Hansen
Foto: Nils Henrik Måsø / NRK

Deanu várresátnejođiheaddjis, Hartvig Hanssenis, lea buorre mokta, go Luondduhálddašandirektoráhta árvalus hilgojuvvo.

GULDAL: Mohtorjohtolatláhka

Gáržžedit bievlavuodjima

Ráđđehus áigu goittotge bidjat johtui sierra prošeavtta, man ulbmilin lea gáržžidit bievlavuodjima Finnmárkkus. Ráđđehusas leat leamaš garra siskkáldas giččut ođđa mohtorjohtolatláhkaárvalusa oktavuođas. Vuođđun dán bargui lea Luondduhálddašan direktoráhta árvalus, man mielde mohtorjohtolaga galgá sakka gáržžedit meahcis. Dát lea Sosialisttalaš gurotbellodaga miela mielde. Bellodat lea ráđđehusas figgan oalát gieldit lustavuodjima meahcis.

Gielddat mearredit

Guovddášbellodat lea háliidan addit gielddaide sierravuodjenlobiid mearredanválddi. Bargiidbellodaga áirasat leat állanan Guovddášbellodaga beallai.

Luondduhálddašan direktoráhta árvalus lea buktán garra digáštallamiid miehtá Norgga, erenomážit Finnmárkkus ja Romssas. Deanu várresátnejođiheaddji, Hartvik Hansen, lea okta sis, geaid Luondduhálddašandirektoráhta árvalus lea garrasit hárdán.