Kárášjoga Cirkle K:a oamasteaddji Albrigt Johannes Rasmussen, muitala ahte sis leat leamašan guhkes bargobeaivvit.
– Maŋŋebárgga gearggaimet gávcci áigge eahkes, nu ahte leat ollusat geat dal áigut geassedeahkaid biilii.
Olu bargu ovddasguvlui
Rasmussen muitala ahte sis leat olu diŋgojumit ovddasguvlui.
– Muhtin biillaide eai leat mis deahkat, šaddat tiŋgot deahkaid ja dat várra bohtet boahtte vahku, nu ahte dalle lea fas boahtte vahku seamma láhkái go dál.
Váikko lea dálvvás leamašan, de Rasmussen oaivvilda ahte livčče jo guhka sáhttit vuodjit geassedeahkaiguin.
Fertet jierpmi geavahit
Statens vegvesenis čuožžu ahte Norggas galgá molsut geassedeahkaide beassážiid maŋŋel. Muhto Davvi-Norggas eai leat seamma njuolggadusat.
Kárášjoga politiijabálvá Arvid Næss muitala ahte Davvi-Norggas galgá molsut geassedeahkaide miessemánu 1. beaivvi, muhto go siivu lea dakkár go lea leamašan maŋemuš vahkkuid, de oažžu jierpmi geavahit.
– Jus mun lean mahkáš alla váriin, dahje áiggun rasttildit alla váriid, ovdamearkka dihte Suoidneleavššá, ja doppe lea jámma muohta, de beasan vuodjit dálvejuvllaiguin maŋŋá miessemánu 1. beaivvi.
Fertet molsut rivttes áigái
Næss dadjá ahte go mannán vahku lei nu buolaš ihkku, de sáhti ain leat jiekŋa muhttin sajiin, muhto ahte mii dál oaidnit movt dálki rievdá ovddasguvlui.
Jus it leat molson geassedeahkaide rivttes áigái de soaittát sákkuhallat.
– Dat váikkuhus lea, jus don it leat molson geassejuvllaide, dás rájes maŋás, de mii čállit sáhku, dahje gebyra, ja dat lea duhát ruvnno maid šattat máksit.
neahttasiiddus oidno ovddasguvlui ahte báhkat eai biste muhto baicce čoaskkida sihke Kárášjogas ja olu sajiin Davvi-Norggas.