Stall Eivik, aktan Hábmera luojvojguovdátjijn, li giesseloahpefálaldagáv Hábmerin jåhtuj oadtjum.
Dát la fálaldahka mánájda vuodoskåvlådásen, ja la fálaldahka massta e dárbaha majdik mákset. Ja ásadiddje dættot dát ij la fálaldahka mij ij la báddnum æjgádij sisboados ja nav, valla la fálaldahka gájkajda.
Andrine Øvervoll Eivik, guhti båndorsijdav jådet, subtsas mánájt båndorsijddaj gåhttju gæhttjalittjat slihturij ja buvij barggat.
– Máná galggi slihturij ja nuppij mánáj siegen suohtastallat. Prográmmav lip dahkam majt máná galggi tjuovot da guokta biejve madi lij danna, tjielggi Øvervoll Eivik.
Barne-, ungdoms- og familiedirektoratet (Bufdir) dáv ásadusáv máksá, ja la juollodam 180.000 kråvnå dán prosjæktaj.
Divrrehotælla
Stall Eivikan lij aktse hesta, niellja bednaga ja kanijna. Duodden aj dåjmadahtti iellijhotellav gånnå de ulmutja máhtti dagu ietjasa bednagijt ja gáhttojt dibddet madi ietja lij mánoj nanna.
Dát giessefálaldahka l navku, ja máná de oadtju hestaj ja bednagij barggat. Dat mij båndorsijddaj gullu.
80 máná de dán giese oadtju dáv niektit, gudi de li guokta biejve båndorsijdan. Ja máná vuojnnet soapptsu, javllá Andrine Øvervoll Eivik, guhti de dáv sihtá dåjmalasj giesseloahpen gåhttjot.
– Buorre tsuojggidusájt lip oadtjum, vuojnnep máná oadtju iehtjasav åvddånahttet ja rubmahijn barggat.
- Lågå aj:
Maja ja Rubi soapptsoba iellij barggat, ja e rat sijddasisá sidá vuolgget biejvet maŋŋela.
– Suohtas la. Mådja divrijda lijkkujin. Galggin ihttátjij liehket.
– Sihtabihtte ájn aktij oassálasstet?
– Diedon, aktan vásstedibá.
– Ja de vat idet sijddaj?
– Jallat lijka.
– Buorre kapasitiehtta
Hábmera luojvojguovdátja tjadá dát ásaduvvá, ja bæjválasj jådediddje Jannita Olvik dættot dát ij la fálaldahka sierraláhkáj sidjij gænna ælla nav ållo rudá, valla fálaldahka gájka mánájda Hábmerin ja Divtasvuonan.
– Dát la gájkajda. Vuostatjin dåssju mánájda Hábmerin, valla vuorbbe gå nav buorre kapasitiehtta l. Dajnas aj divtasvuonakmánájt gåhtjojma.
Ja Olvik subtsas iemeláhkáj la valástallamfálaldahka mánájda ja nuorajda, valla båndorsijdan ælla bárep gájbbádusá, ja dajnas máhtti divna dási oassálasstet.
– Dábálasj la valástallamfálaldagáv ásadit, valla máhtudagáv oassálasstijs gájbbet. Gå båndorsijdan ásadip de divna máhtti oassálasstet.