NRK Meny
Normal

Dáistala Gaskarievttis amas ealus massit

Jovsset Ánte I. Sara lávke disdaga Hålogalándda Gaskariektái Romssa gávpogis boazologu áššis. Maŋŋil go Sis-Finnmárku diggegoddi áššehuhtii su njukčamánus diibmá, de stáhta guoddalii duomu.

Jovsset Ánte Sara med sin advokat Trond P. Biti

FAS DIKKIS: Jovsset Ánte I. Sara lávke fas diggestohpui ákkastallat mearriduvvon boazologu vuostá.

Foto: Nils Henrik Måsø/NRK

2014 njukčamánus dat Eanandoallo- ja biebmodepartemeanta mearridii ahte Jovsset Ánte Sara galggai geahpidit boazologus 75 heggii.

Jovsset Ánte Sara ii dohkkehan dan mearrádusa, áššáskuhtii Norgga stáhta, ja vuittiige ášši stáhta vuostá Sis-Finnmárkku diggegottis. Stáhta ii vuollánan Sis-Finnmárkku diggegotti duomuin, ja guoddalii duomu gaskariektái.

Áidna gii lea guoddalan

Boazodoallostivra dat lea mearridan alimus boazologu máŋgga Finnmárkku siiddaoassái, ja sidjiide lea biddjon proseantadási mielde seamma stuorra njuovvangáibádus. Vuođđun mearriduvvon njuovvangáibádussii lei siidaosiid 2012 njukčamánu 31. beaivvi boazolohku.

Jovsset Ánte Sara ii dohkkehan iežas guovdu mearriduvvon boazologu, ja dajai dalle ahte nie vuollegis boazolohku mearkkaša reastaluvvama, ja danin son ii dáhtton doahttalit mearriduvvon njuovvangáibádusa.

Vuosttaš boazoeaiggát dikkis

Jovsset Ánte Sara lea vuosttaš boazoeaiggát guhte boazologu ášši doalvvuha dikki ovdii. Váikko eará ge boazoeaiggádat leat jurddašišgoahtán dien guvlui, de dattetge Jovsset Ánte Sara lea vuosttaš gii dál beassá iskat ášši diggestobus.

Dán diggeášši loahpalaš duomu vurdet dál ollu eará boazoeaiggádat miellagiddevašvuođain. Duopmu sáhttá váikkuhit dasa maid eará boazoeaiggádat dahket, juogo guoddalit stáhta dahje vuollánit ja geahpidit boazologu.

Gaskarievttis

Áššái, mii álgá ihttin disdaga Gaskarievttis Romssas, leat rádjejuvvon golbma beaivvi, ja loahpahuvvo duorastaga. Stáhta advokáhtat leat Ida Thue ja Stein-Erik Jahr Dahl, ja Jovsset Ánte Sara advokáhtta ges lea Trond Pedersen Biti.