Dáiddaskuvlla stáhtadoarjja maŋŋona

Oahpahusdirektoráhtta lea badjelaš vahku áigi dieđihan Sámi Dáiddaskuvlii Kárášjogas ahte sii dollet stáhtadoarjaga borgemánu rájes danin go skuvla ii leat sádden dievaslaš rehketdoalu ovdal geassemánu 1.beaivvi.

Eva Aira

Dáiddaskuvlla rektor Eva Aira lohka dál sádden váilevaš raportta Oahpahusdirektoráhttii.

Foto: Dan Robert Larsen / NRK

Oahpahusdirektoráhtta čállá ahte sii eai leat ožžon dievaslaš rehketdoalu 2015 doaibmajagi ovddas danin go rehketdoallodárkkisteaddji raporta váilu. Direktoráhtta čállá ahte sii dollet stáhtadoarjaga dassážii go ožžot raporta mii váilu 2016 borgemánu rájes.

Ii leat vel ožžon

Skuvla lei ožžon áigemeari buktit váilevaš raportta ovdal suoidnemánu 25.beaivvi. oahpahusdirektoráhtta ii lean vel ožžon váilevaš raporta odne suoidnemánu 26.beaivvi, duođašta direktoráhta seniorráđđeaddi, Børre Martinsen.

Ollu bargu

Reivve man oahpahsdirektoráhtta lea čállán, lea son dál odne ožžon. Dan muitala Dáiddaskuvlla rektor Eva Aira.

– Mus lea leamašan geasseluopmu, iige oktage sáhte gáibidit ahte mun galggat 250% bargat. Dan dadjá Dáiddaskuvlla rektor, Eva Aira, ja lohka iežas leamašan báikkis gos ii leat leamašan ii telefovdnaoktavuohta ge.

Lohka dál sádden

Eva Aira lohka boastu ipmárdusa sivvan dasa go dát dilli dál lea čuožžilan, ja lohka iežas dál sádden rapporta oahpahusdirektoráhttii.