«Dáidda Pride» čájáhus

Dáiddaskuvlla rektor ja oahpaheaddji: – Lea oba somá ahte min oahppit besset čájehit maid leat bargan dán jagi.

Created by InfoDispatcher

ČÁJÁHUS: Kárášjoga dáiddaskuvla doallá čájáhusa DnB-guovddážis golbma beaivve.

Otne rahppui «Dáidda Pride» nammasaš čájáhus. Čájáhusas besset oahppit geat leat vázzán dáiddaskuvlla vuosttaš jagi čájehit iežaset govaid.

Njeallje oahppi leat čájeheamen iežaset dáidagiid. Golbma beaivve bistá dát čájáhus man gávnnat DnB-guovddážis Kárášjogas.

Rámis

Eva Aira lea rektor ja oahpaheaddji. Su mielas heivii bures ahte sin čájáhusa namma lea «Dáidda Pride» aiddo dál, go lea Sápmi Pride Kárášjogas dán vahkkoloahpa. Son muitala ahte olusat leat jearran gullá go čájáhus dasa.

Čájáhus ii gula Sápmi Pride:i, muhto Eva sávvá ahte dat geat servet Sápmi Pride:i maiddái bohtet geahččat sin dáidagiid.

Čájáhusa namma lea Dáidda Pride, ja pride mearkkaša čeavlái. Ja mii leat ge issoras čeavlái dáinna dáiddačájáhusain.

Eva Aira

Govva rievddai máledettiin

Deatnulaš Ánne-Bergitte Henriksen lea oahppi dáiddaskuvllas. Son muitala ahte son lea oahppan ollu skuvllas. Skuvla lea sutnje leamašan miellagiddevaš. Go son mále, de geavaha olu sámeivnniid, ja erenomážit alit ivnni.

Dorvvolaš govva

«Dorvvolaš» lea dán gova namma.

Foto: Henriette Johnsen Joks / NRK

“Dorvvolaš” lea okta dáidda maid Ánne-Bergitte lea ráhkadan. Govas lea gávttehas sámenisun mii čájeha iežas givrodaga. Dáiddaoahppi muitala ahte govva rievddai máledettiin.

– Álggos lei sámenisu lávus, muhto govva rievddai. Dál son lea boahtimin lávvui.

Sámenisuolbmot fertejit leat hui gievrra, dainna go dat lea ovddešáiggi deddon vulos. Lihkká vaikke lea buoret dillii dál, de lea máŋgga láhkai lihkká ollu badjelgeahččanvuohta.

Ánne-Bergitte Henriksen