Norgga goahkaid riikkasearvvis Finnmárkkus dáhtošit árvalusaid mo sáhtášii ruoššaluosas ráhkadit buori biepmu. Moatti vahku geažes vurdo ruoššaluossa dievvat vuonaide ja gorgŋet jogaide, erenoamážit Romssas ja Finnmárkkus. Danne ávžžuha Finnmárkku goahkaid searvi dál ovttasráđiid hutkat maid sáhtašii ruoššasluosas málestit ja nu fidnet olbmuid borrat dan, dadjá searvvi jođiheaddji Stig Anton Eliassen.
Norgga luonddudutkan instituhtta, NINA, máksá 150 kruvnna juohke hávgga ovddas mii lea guhkit go 20 centimehtera ja lea goddon Iešjogas ja Kárášjogas.
Dan dieđiha Ságat.
Hávggaid galggašii bivdit nu árrat go vejolaš, ja lea Čoavddatmohki ja Sámmáljohknjálmmi gaskka gos NINA ávžžuha bivdit. Hávggaid sáhttá doalvut Jergul astui dahje Karasjok Campingii.
Romssa ja Nordlándda rittus lea dál viiddis soahtehárjehallan. Arctic Challenge soahtehárjehallamis leat ollu soahtefatnasat ja sullii 150 soahtegirdi 14 Nato riikkas mielde. Maiddái Andøya Space rakeahttabáhččinguovddážis leat dás mielde. Suodjalusa operatiiva vákta, Thomas Gjesdal lohká áiggi dál dakkárin ahte šaddet ollu soahtehárjehallamat sihke Norggas ja Natos. Arctic Challenge hárjehallan bistá geassemánu 11.beaivái.
