NRK Meny
Normal

Báikkálaš hálddašeapmi eastadivčče riidduid

- Báikkálaš hálddašeapmi unnidivččii luossabivdiid riidduid. Dan jáhkiba Deanu ja Kárášjoga sátnejođiheaddjit.

Fiskestrid i Tana
Foto: Anne Berit Anti / NRK

  Guldal: Báikkálaš hálddašeapmi eastadivcce riiduid

Mannan vahkkus riidališgohte fas luossabivdit luossabivdinsajiid nalde Deanus.

Dál hohpoheaba Kárášjoga ja Deanu sátnejođiheaddji guovttis báikkálaš hálddašeami Deanu čázádahkii.

 

- Mun jahkan ahte báikkálaš hálddašeapmi dagačii buot ollu buoret dan dihte go dalle lea vejolaš reguleret dan lahkai ahte buohkat šaddet duhtavaččat, lohká Kárášjoga sátnejođiheaddji, Kjell Sæther.

- Muhto dies gokko Suopma lea nuppebeal joga gal fertet mii maiddái šaddat ovttaoaivilis Suomabeale olbmuiguin, lasiha son.

Eahpečielggas mo njuolggadusat šaddet

Sæther ii dieđe gal justa makkár konkrehta njuolggadusat galggašedje eastadit riidduid báikkiolbmuid ja turistaid gaska.

- Dat lea váttis diehtit justa dál man lahkai dat šaddá, go dat leat máŋgasat geat galget daddjat maid sii oaivvildit ovdal go njuolggadusat čilget, lohká son.

Deanu sátnejođiheaddji ovttaoaivilis

Deanu sátnejođiheaddji, Ingrid Smuk Rolstad maid jáhkká ahte riiddut jávket nu jođánit go báikkálaš hálddašeapmi Deanučázádagas lea doaimmas.

- Mun jáhkan ahte go báikkálaš hálddašeapmi boahta, de lea báikkálaččat beroštupmi ahte čázádat galgá hálddašuvvot dan lahkai ahte dat lea ávkin álbmogii, ja ahte turisttat geat bohtet deike ožžot buori vásáhusaid go leat fitnan dáppe, lohká Rolstad.

Dolkan vuordimis

2004:is jo álggahuvvui bargu ásahit báikkálaš hálddašeami Deanučázádahkii. Dalle logai Birasgáhttendepartemeanta ahte dál ii leat go lávdegotti nammadit mii sáhttá árvalit mo hálddašeapmi galggašii leat. Golbma jagi maŋŋá ii leat dát bargu ollen ii gosage.

Dál leaba sátnejođiheaddji guoktá dolkagoahtan vuordimis.

- Mun bealistan in ádde manne dat manná nu njozet dát ášši, lohká Rolstad.

Seamma oaivilis lea maiddái Sæther.

- Dat lea menddo guhkes áigi mannan dan rájes go álge dán plánet.