Bargiidbellodaga parlamentáralaš jođiheaddji Vibeke Larsen ii dieđe galgá go váldit duođas oktasaščállosa maid Árja, Nordkalottfolket, Ovddádusbellodat, Dáloniid Listu ja Johttisápmelaččaid Listu leat sádden Sámedikki jođihangoddái.
Čállosis čuoččuhuvvo ahte Vibeke Larsen ii sáhte leat šat opposišuvdnajođiheaddji maŋŋá go Bargiidbellodat ja NSR leaba soahpan bušeahttaovttasbarggu Sámedikkis.
– Dat rolla ferte gullat sámediggeáirasii guhte duođai ovddasta opposišuvdnabellodagaid, oaivvildit bellodagat mat leat vuolláičállán oktasašreivve.
Vibeke Larsen lohká iežas oaidnán čállosa, muhto imaštallá garrasit maid sii duođaid oaivvildit.
– In leat goassige diehtán ahte mun lean leamaš opposišuvdnajođheaddji maiddái namahuvvon bellodagaid ovddas, čaibmá Larsen.
– Ásahan oktasaš parlametáralaš vuođu
Bellodagat mat leat vuolláičállán oktasaščállosa, leat bivdán Sámedikki jođihangotti váldit oktavuođa daid bellodagain geat duođaid leat opposišuvnnas, ja sin gaskkas válljet opposišuvdnajođiheaddji.
Go Bargiidbellodat ja NSR dál leat soahpan bušeahttaovttasbarggu, de han dat guokte bellodaga praktihkalaččat seammás leaba ásahan maid oktasaš sámediggeráđi parlamentáralaš vuođu, oaivvildit čállosa vuolláičállit.
Dálá dilis sin mielas leat dušše dát bellodagat opposišuvnnas: Árja, Nordkalottfolket, Ovddádusbellodat, Olgešbellodat, Åarjel-saemiej Gïelh, Dáloniid Listu ja Johttisápmelaččaid Listu ja Sámit lulde.
– Lea váttis váldit duođas sin
Vibeke Larsen imaštallá garrasit manne namahuvvon bellodagat leat sádden dákkár gáibádusa.
– Inge leat goassige gullan ahte dákkár ámmát dal gávdnošii Sámedikki vuogádagas. Danin lea váttis váldit duođas sin ávžžuhusa, Larsen vástida.
Váikko Bargiidbellodat lea ovttasbargan NSR:ain bušeahta oktavuođas, de han dat su mielas ii mearkkaš ahte sii leat náitalan NSRain.
– Mu dieđuid vuođul lea Bargiidbellodat ain Sámedikki stuorámus opposišuvdnabellodagat. Dainna áigumušain mii ain áigut joatkit dán áigodagas. Manin bat mun livččen galgan leat opposišuvdnajođiheaddji maiddái eará bellodagaid ovddas? Ja guhkkin eret joavkku ovddas gos maiddái Ovddádusbellodat lea mielde, čaibmá Larsen.