Dáhto bargoráfi: – Politihkkárat galget gaccaid doallat eret

Norgga stuorámus suohkana sátnejođiheaddji, Johan Vasara, lea okta daid oamasteami vuosttaldeddjiin ja lohká dan leat dárbbašlaš almmuhit:

– Na prinsihppa dásis gal sáhttá dieđusge olmmoš bealuštit ahte oamastanvuoigatvuohta gávdno, muhto mun gal lean, go geahčan daid praktihkalaš beliid mii guoská oamastan vuoigatvuhtii, de mun lean áibbas vuostá, dadjá Vasara.

Maŋŋá go Unjárgga gilisearvi vuittii hálddašanvuoigatvuođa Meahcceduopmostuolus de leat Finnmárkkus politihkkárat reageren, ja oaivvildan ahte Finnmárkkuopmodat – FeFo berre eaiggáduššat ja hálddašit Finnmárkku eatnamiid, eai ge gilisearvvit.

– Állet seagut deike!

Badje Deanu Siidda lahttu, Lemet-Jon Ivvára mielas orrot politihkkárat badjelgeahččamin ahte Finnmárkku Kommišuvnna vuoigatvuođa kártenbargu lea vuolggahuvvon Norgga Stuorradikkis ja dalle galggašii kommišuvdna bállet bargat barggus.

Sus lea čielga diehtu dakkár politihkkáriidda:

– Politihkkárat galgat dál doallat eret gaccaid áššis, go dat heargesáhttu lea jo mannan meattá - áššit leat čielgan - nu ahte dat eai galgga šat seaguhit deike!

Finnmárkku kommišuvdna ásahuvvui 2008:s ja bargun lea kártet finnmárkulaččaid geavahan- ja oamastanvuoigatvuođaid maid áiggiid čađa ležžet olahan. FeFo fas lea hálddašeaddji Finnmárkku eatnamiidda, dassái go vuoigatvuođat leat čielggaduvvon.

Kommišuvdna mearrida ieš makkár guorahallanguovlluid ásaha ja mo daid juohká, daddjo kommišuvnna neahttasiiddus.

Váilevaš diehtu

Muhto Vasara ii mieđit gal garvigoahtit ášši, ja lohká diehtit bures dan láhkavuođu:

– Na, diet láhka - Finnmárkku láhka - lea čállon politihkkáriin ja dat leat politihkkárat mat leat dan hábmen ja ovddidan Stuorradiggái ja mearridan doppe dan. Dieđusge doppe lea ulbmil oažžut mielde dan oamastanvuoigatvuođa ja vuoigatvuođaid oppanassiige árvvoštallojuvvot kommišuvnna bokte.

– Muhto seammás ferte politihkalaččat maid signaliseret dan mii livčče buorrin álbmogii - olles álbmogii - ja mun jáhkán buoremussan livčče ahte olbmot, báikegottit, ožžot geavahanrievtti dan sadjái go oamastan rievtti.

Maiddái Deanu sátnejođiheaddji, Frank Ingilæ, balaha kommišuvnna vuoigatvuođaid dovddasteami buktit eanet moivvi go ávkki.

Jus eanet guovllut fidnežit hálddašanvuoigatvuođa, nu go Unjárgga Gilisearvi leat dahkan, de oaivvilda son Finnmárkku hálddašeami šaddat moivvasin.

FeFo lea geažidan ahte bohtet guoddalit Meahcceduopmostuolu duomu.

Láhka geatnegahttá

Lemet-Jon Ivvár gal datge bivdá politihkkáriid geahčadit Finnmárkku lága lagabuidda.

– Sii berrešedje čiekŋudahttit iežaset sihke Finnmárkku láhkii, mii doaibmá, já dat galggašii maiddái, jus leš dárbu, jearrat vaikke Ráđđehusa dahje Youngstorgetas dahje Stuorradikkis.

Doaimmahuslaš mearkkašupmi; Badje Deanu Siidda láhttu, Lemet-Jon Ivvár lea NRK Sápmi direkteavrra Mona Solbakk áhčči.

Direktevrra Solbakk ii leamaš mielde dán ášši árvvoštallat dahje hápmet.