18 sámi tv- ja filbmafálaldaga olles bearrašii

Dál leat ohcan neahtas ja burgán NRK arkiivvas sámi filmmaid, TV-ráidduid ja dokumentáraid, maid sáhtát návddašit geasseijaid ja -eahkediid.

Filmmat:

Ofelaš (1987)

Kategoriija: Fikšuvdnafilbma, Drámá

Gos gávnnat? Sáhtát oastit dahje láigohit filmma Itunes Stores.

Measta juohke sápmelaš lea gullan dahje diehtá dán filmma birra. Vuolgit ruovttoluotta 1800-lohkui, ja deaivvadat dan áiggi Áiginiin (Mikkel Gaup), gii ráfálaččat eallá iežas bearrašiin Finnmárkku galbma duottarmáilmmis. Áigin vásiha ahte čuđit goddet su bearraša, váldet su gitta ja bággejit su ofelastit sin sámi gillái ja son de plánegoahtá mo dáid fasttes daguid mávssahit. Filbma lea ráhkaduvvon guovddáš dálvvis, nu ahte muođut vel soitet suvžžagit geahčadettiin.

Bihttoš (2014)

Kategoriija: Oanehis-filmmaš

Gos gávnnat? Rávdnjenbálvalusas, Sapmifilm

Blackfoot indiána ja sámi filbmadahkki Elle-Máija Tailfeathers filbma «Bihttoš» lea čájehuvvon olu internationála filbmafestiválain. Boares govaid, neavttašeami ja animašuvnna bokte čájeha Tailfeathers mo dološ vearredagut leat váikkuhan su váhnemiid náittosdillái.

Sameblod (2016)

Kategoriija: Fikšuvdnafilbma, drámá

Gos gávnnat? Netflix rávdnjenbálvalusas, ja laiggodit dahje oastit Itunes Store.

Muhtimat čilgejit ahte «Sameblod» lea ráhkisvuođacealkámuš sidjiide, geat vulge ja geat báhce. Elle Márja (Lene Cecilia Sparrok) (14) lea lullisámi boazodoalli 1930-logus. Go nieiddaš vásihišgoahtá vealaheami ja nálle-dutkamiid skuvllas, de áibbašišgoahtá eará eallima. Hállu fárret gávpogii ja šaddat áibbas eará olmmožin stuorru, muhto jus son dan dahká, de ferte guođđit iežas kultuvrra ja bearraša.

Bázo (2003)

Kategorija: Fikšuvdnafilbma, komedia

Gos gávnnat? Rávdnjenbálvalusas, Sapmifilm

Buohkat gohčodit Emila bázon. Sus lea viellja, geainna ii leat nu buorre oktavuohta. Muhto Bázo lea hui buorre iežas villjii, ja mo de geavvá Bázoin go su viellja jápmá. Dát filbma lei nammaduvvon Buoremus filbmain Amanda bálkkašupmái jagi 2003.

Jikŋon 2 (2019)

Kategorija: Animašuvdnafilbma

Gos gávnnat? Láigohit, SFanytime

Dieđusge fertet namuhit Jikŋon 2 maiddái dán listtus. Dát lea vuosttaš Disney filbma sámegillii. Filmmas deaivvadit fas Elsa, Anna, Kristoffer, Oleg ja Sven ja sii mearridit vuolgit gelddolaš mátkái gos háliidit gávnnahit manne Elsas lea noaidefámut.

Oru lea buoret go jođi- filbmaráiddoš (2020)

Kategoriija: Oanehis-filmmažat

Gos gávnnat: Rávdnjenbálvalusas Sapmifilm

Cuoŋománus hásttuhii Sámi Filbmainstituhtta filbmadahkkiid ráhkadit oanehisfilmmaid, mat govvidit koronavirusdili. Boađusin leat dál 15 oanehisfilmma iešguđetge šáŋŋeris, maid 18 bagadalli leat dahkan.

Hilbes Biigá (2015)

Kategoriija: Oanehisfilbma, drámá

Gos gávnnat? Rávdnjenbálvalusas, Sapmifilm

Geassi Davvi-Sámis, gaskaija beaivváš, ijahis ijat ja guokte dolkan nuorra nieidda smávva gilážis. Máigon ja Ánne-Sire mearrideaba vuolgit mátkái, mátki mii lea geahččalusaid haga.

TV-ráiddut

Sámis buvttaduvvojit čađat olu tv-ráiddut, dás háliidat namuhit erenoamážit ođđa ráidduid maid it soaitte leat oaidnán. Juohke ráiddus lea sierra fáddá ja muitalusat sámiid birra. Dása leat čohkken ođđa ráidduid, namuhat dieđusge ahte leat maiddái eará tv-ráiddut dego Melkeveien, Reinlykke ja guoimmuhan prográmma Pulk ja olu eará.

Tvångsförflyttningar – Bággojohtin (2020)

Kategoriija: Dokumentára-ráidu

Gos gávnnat? Nuvttá, SVT play

Golmma oasis muitaluvvo losses dáhpáhus ja oassi Ruoŧa ja sámi historjjás. Bággojohtin Ruoŧa beale Sámis muitala garra persovnnalaš muitalusaid ja deaivvadat olbmuiguin, geaidda dát lea čuohcan ja ain čuohcá.

Drömmarnas hantverk (2019)

Kategoriija: Dokumentára-ráidu

Gos gávnnat? Nuvttá, SVT Play

Dán doku-ráiddus čuovvut Nika, Lisa ja Merethe, golbma nuorra duojára, geat ráhkistit sámi duoji. Čuovvut golmma oasis go ráhkkanit čájáhussii internationála festiválii Riddu Riđđu. Dás beassat oahpásnuvvat nuoraiguin, geat ođđaáigásaš servodagas doalahit ja fátmmastit árbevirolaš duoji, ja lea maid veara namuhit dan olu fiinna duoji, maid olmmoš beassá oaidnit.

Gearddit (2019)

Kategoriija: Dokumentára-ráidu

Gos gávnnat? Nuvttá, Yle Areena

Gearddit lea oanehis dokumentára ráidu, golmma nuorra Suoma beale sápmelaččaid birra. Dán ráiddus bohtet ovdan fáttát dego identitehta, psyhkalaš dearvvašvuohta ja boahtteáigi. Seamma áiggis muitaluvvo nuorra minoritehta árgabeaivi ja hástalusat, mat gullet dasa go gullá servodaga unnitlohkui..

Dokumentárat

Sámis leat olu dokumentárat. Dá leat golbma filmma, maid mii leat gávdnan, juohke filbma lea erenoamáš iežas ládje.

Biebbmo (2017)

Kategoriija: Biebmo-dokumentára

Gos gávnnat? Nuvttá, NRK TV

Biebbmo lea julevsámi sátni. Muhto mii lea sámi biebmu? ja manne lea dehálaš suodjalit dan? Dán dokumentáras láidesta Greta Huuva geahčči olles jagi sámi luonddus, mii dat sámi árbevirolaš borramušáiti lea. Árrageasi šattut, luomejeaggi ja čakčat bivdo- ja njuovadanáigi.

Sparrooabbán (2015)

Kategoriija: Dokumentára

Gos gávnnat? Nuvttá, Vimeo.com

Suvi Westa persovnnalaš dokumentára Sparrooabbán muitala mo dat lea unnitlohkun leat unnitlogus. Filmmas deaivvadat oappážiiguin ja mo homoseksualitehta doaibmá sámi servodagas mas leat jo čielga rájit go lea sáhka ráhkisvuođas ja sohkabeliin.

Katarinas lengsel etter barn (2020)

Kategoriija: Oanehis-dokumentára

Gos gávnnat? Nuvttá, SVT play

Dán oanehis dokumentáras oahpásnuvvat Katarina Blindain, gii rahpasit muitala mánáhisvuođa birra. Dán filmmas leat dovddut ja duostilit lokte Blind fáttá man birra ii hállo olus. Katarinas lea okta bárdni, ja dál son sávašii ovtta máná vel.

Nuoraide ja mánáide

Dađibahábut eai leat nu olu tv-ráiddut nuoraide, muhto leat viggan čohkket muhtin fálaldagaid mánáide ja nuoraide.

Skáidi (1995)

Kategoriija: TV-ráidu, gealddaráidu

Gos gávnnat? Nuvttá, NRK TV

Skáiddis deaivvadit Biera Nillasiin ja su skihpáriiguin Guovdageainnus 90-logus. Skáidi lea ovccioasát dáhpáhusráidu, mas čuovvut nuoraid, geat fuobmájit ahte muhtimat verrošit bohccuiguin. Dá lea dramahtalaš muitalus, mas lea olu action, ustitvuohta, ráhkisvuohta. Olu dáin fáttáin leat ain áigeguovdilat.

Laara & Leisa (2015)

Kategoriija: Mánáid TV-ráidu, fikšuvdna

Gos gávnnat? Nuvttá, NRK TV

Lulli sámi mánáid drámáráidu. Laara ja Leisa fárreba ruovttubáikkis Raarvihkenis Snåasei. Snåases soai vázziba sámeskuvlla ja orruba internáhtas. Mo galgaba soai sajáiduvvat dohko, oahpásnuvvat olbmuiguin ja birget buot hástalusaiguin. Dán tv-ráiddus leat guokte áigodaga.

Mumenvággi (2020)

Kategoriija: Mánáid TV-ráidu, animašuvdna

Gos gávnnat? Nuvttá, YLE Areena

Ođđa Mumenvággi-ráiddus deaivvadat fas mumeniiguin. Unna Miáš, Mumrihkka ja eará mumenvákki ássit ja sin gelddolaš mátkkit. Dál sii hállet maiddái davvisámegiela.

Ante (1975)

Suorgi: Mánáid TV-ráidu, Fikšuvdna

Gos gávnnat? Nuvttá, NRK TV

Ánte tv-ráidu lea klassihkar, dát tv-ráidu lea okta dain vuosttaš sámi tv-ráidduin ja šattai beakkánin go čájehuvvui TV:s. Guđa oasis oahpásnuvvat 10-jahkásaš Ántiin. Ánte bággehallá vuolgit bearraša luhtte eret vázzit skuvlla. Muhto Ánte ii beasa hállat iežas eatnigiela skuvllas ja áidna maid son háliida lea vuolgit ruoktot bearraša lusa fas. Dán ráiddus loktejuvvojit ovdan hástalusat, maid sápmelaččat šadde gillát dáruidahttináiggi.

90 logu mánáid TV ja eará

Suorgi: Mánáid TV ráiddut

Gos gávnnat? Nuvttá, NRK TV

NRK TV:s leat olu fálaldagat mánáide, daid leat čohkken ovtta leŋkii NRK TV,

Gávdnojit olu fálaldagat mánáide NRK TV siiddus, daid leat čohken ovtta leŋkii doppe sáhtát fas oahpásnuvvat Káreninain, guldal dološ máidnasiid ja olu eará gávnnat min siidduin.

Konsearttat ja musihka ráiddut

Jus it hálit TV ráidduid dahje filmmaid geahččat de gávnnat olu musihkkafálaldagaid NRK TV čujuhusas.Doppe gávnnat sámi musihkka tv-ráidduid nugo Muitte Mu ja Sapmi Sessions. Juoigalasat lea ges prográmma, mas gullat luđiid olles Sámis. Muđui leat konsearttat sihke Mari Boine, Mihávuođa konsearta gos earret eará Sofia Jannok, Marja Mortensson ja Katarina Barruk čuojahit.

• Loga nai: Máid máhtát sámi filmmaid ja ráidduid birra?
• Loga nai: Disse Instagramkontoene må du bare få med deg