– Eai biddjo doarvái návccat gávdnat sámi biebmoruovttuid

Guovdageainnu mánáidsuodjalusa jođiheaddji cuiggoda Finnmárkku biebmoruovttuid- bálvalusa go eai bija eanet návccaid háhkat biebmoruovttuid gos hállet sámegiela.

Berit Anette Hætta

Guovdageainnu mánáidsuodjalusa jođiheaddji Berit Anette Hætta mielas ii oro Finnmárkku biebmoruovttuid-bálvalus vuoruhan gávdnat sámi biebmoruovttuid.

Foto: Anne Olli

Finnmárkku biebmoruovttuid bálvalus ii leat bargan barggus, oaivvilda Guovdageainnu mánáidsuodjalusa jođiheaddji Berit Anette Hætta.

– Logi jagis dat leat leamaš oktii Guovdageainnus ohcamin sámi ruovttuid, ja mii leat máŋgii jearahallan goas boahtibehtet Guovdageidnui.

Lohpida rievdadusaid

Biebmoruovttuid bálvalusa ossodatjođiheaddji Torbjørn Johansen mieđiha iežaset unnán leat leamaš jođus ja lohpida rievdadusaid.

Go eai leat doarvái bures bargan, de šaddet ge sámemánát duos dás dárogielhálli biebmoruovttuide, nugo geavai duvle ovdalaš jahkemolsuma ge.

– Sámi mánát geain leat erenoamáš fuolahusdárbbut, mat dárbbašit dakkár erenoamáš biebmoruovttu, de dađi bahábut dat eai gávdno, ja de šaddet dáža ruovttuide. Ja de lea hui váidalahtti go nu lea.

Ii oktage sámegielhálli bargi

Finnmárkku Biebmoruovttuid bálvalusa logi bargis ii leat oktage sámegielhálli. Dál livčče áigi virgádit sámegielhálli bargi, oaivvilda Hætta.

Torbjørn Johansen

Biebmoruovttuid bálvalusa ossodatjođiheaddji Torbjørn Johansen lohpida bidjat eambbo návccaid gávdnat sámegielhálli biebmoruovttuid.

Foto: Piera Balto

– Ja nu go mii oaidnit, de ii dahkkojuvvo doarvái buorre bargu justa dan ahte gávdnat sáme ruovttuid ja mii jurddašit maid dan ahte go galgá ohcat sámi ruovttuid, de berrešii leat olmmoš gii hálddaša sámegiela ja geas lea sámi kulttur gelbbolašvuohta, ahte dat livčče de soaitit álkibut gávdnat sámegielat ruovttu, lohká son.

Johansen lohká oaidnit ahte livččii ovdamunni jus sis livčče sámegielhálli bargit.

– Dássážii ii leat oktage geain lea dakkar gelbbolašvuohta ohcan min virggiide. Mis leat gal doarvái bargit geain lea sámi kultur-gelbbolašvuohta, muhto ii oktage dáin huma sámegiela. Oainnán dál ahte livččii stuora ovdamunnin midjiide jus mis livčče sámegielhálli bargit, lohká son.